SHILLONG, Naitung 12: U Myntri Rangbah ka Jylla Meghalaya- kata u Conrad K Sangma, u la plie paidbah ïa ka Meghalaya Youth League 2024 hynne ka Sngi Thohdieng ha State Convention Centre ha ka jingïadon ryngkatlang ki dkot nongkitkam jong ka Meghalaya Football Association (MFA), ba kynthup naduh u President- Bah Hamletson Dohling, Secretary- Bah Suresh Syiem lem bad kiwei ki dkhot ba ïakit ïabah ïa ka kam jong ka MFA, nangta ki nongïalam jong ka Meghalaya Olympic Association, u Working President- Bah John F Kharshiing.
Haba ai jingkren ha kane ka sngi, na ka liang jong u Myntri Rangbah ka jylla u Conrad K Sangma u la ong, “Ka dei shisha ka jingthmu kaba khraw jong ka Meghalaya Football Association ban pynlong ïa ka Meghalaya Youth League 2024, bad kane ka long ruh ka rynsan kaba kongsan ban wad ïa ki khynnah samla kiba don ïa ka sap. Kane ka dei ka lympung ka ban wanrah jingkylla ym tang hangne hynrei ka ban paw pyrthei, ha ka thaiñ bad kumjuh ha baroh kawei ka ri.”
Haba u President jong ka MFA u la wan ban ïakynduh ïa Nga, Ngam shym la artatien ban mynjur bad pynïar ïa ka jingkyrshan jong ka Sorkar sha ka seng namar ba ka Meghalaya Football Association ka dei ka seng kaba lah shisha ban noh synñiang ha ka ban kyntiew ïa ka Sport bad ruh ïa khynnah ba donsap hapoh ka jylla. la bynrap u Myntri Rangbah- Conrad Sangma.
“Kane ka dei ka jingkhmihlynti kaba ki samla jong ngi ki lah ban tei ïalade ban kyntiew ïa ka kam naduh ka jingïalehkai ha ka rukom kaba dei ryngkat ka jingkyrshan jong ka sorkar kaba long ba la kloi ban bei tyngka ban tei bad kyntiew ïa ka lawei jong ka jylla,”u la ong da kaba pynkynmaw ruh ïa ki buit treikam ba ka sorkar ka la pynkhreh ïa ka Sports ha u snem 2019.
Shuh shuh, u la ong ba ka sorkar, da ka jingïatreilang jong ki synjuk bapher bapher kum ka MFA, kan plielad ïa ki rynsan kiba kongsan na ka bynta ki samla khnang ba kin lah ban pynpaw pyrthei ïa ka sap kaba maki ki don, bad ruh ban wanrah nam bad burom ïa ka Jylla bad ïa ka ri hi baroh kawei. U la ban jur ba ka long kaba donkam ban bei tyngka bad ban pyrkhat na bynta ki samla, namar ka lawei ka shong haki bad ka donkam ban pyniaid ïa kum kine ha ka lynti kaba dei.
U la pynpaw ruh ba ka long kaba donkam ban pynthikna ïa ka jingpynheh pynsan ïa ki sap kiba dang khie khnang ba kin lah ban bud ryntih bad tyngkai ïa kaei kaba ki sngewtynnat bad ieid, bad lyngba kane ba ka Sorkar ka la pynlong 3 tylli na ki 5 tylli ki Meghalaya Games ha kine ki 7 snem ba la dep.
U la pynkynmaw ruh ba ka Sorkar ka la thaw shibun ki lad ki lynti ban kyntiew ïa ki kam ïalehkai ha kine ki 5 snem ba la dep bad ka la thmu ban tei shuh shuh ïa ki jaka ïalehkai kum ki stadium ha ki snem ban wan.
Kane ka league kan sdang naduh ka 20 tarik mynta u Naitung 2024, ha kaba yn ïashimbynta da ki synjuk bapher bapher kiba napoh ka jylla. La phiah ïa kane ka League sha ki ar bynta, kawei ha ka kyrdan Sub Junior na bynta kiba hapoh 14 snem, bad kawei na bynta kiba hapoh 16 snem.
Ka rukom ïalehkai jong kane ka League kan long hapdeng ki synjuk kiba don hapoh ki district ka jylla Meghalaya, ba kynthup ïa baroh 20 tylli ki synjuk ba la ïasoh bad ka Meghalaya Football Association.
Ha ka thup kynhun jong ka East Zone – ki kynthup ïa ka Shillong Sports Association, Sohra Sports Association, Riwar Mihngi Football Association, Ri-Bhoi District Sports Association bad ka Western Ri-Bhoi District Sports Association.
Ha ka West Khasi Hills Zone- ki kynhun ki long ka : Tyrsad Area Sports Association, Eastern Border Sports Association, Eastern West Khasi Hills( Pyndemumiong Sports Association), Mawkyrwat District Sports Association, Nongstoin District Sports Association bad ka Mawshynrut Sports Association.
Ha ka Jaintia Hills Zone- West Jaintia Hills District Sports Association, East Jaintia Hills District Football Sports Association, Amlarem Sports Association, Saipung Block Sports Association bad ka Laskein Sports Association
Ha ka Garo Hills Zone- District Sports Association of Tura, Williamnagar District Sports Association, District Sports Association North Garo Hills bad ka Baghmara District Sports Association.
Ka jingthmu ba kongsan ban pynlong ïa kane ka league ka long ban wad ïa ki sap ha baroh ar kyrdan (Under-14 bad 16) ki ban mihkhmat ïa ka Jylla ha ka National Football Championships, bad ka khmih lynti ban pynlong ïa kane ka league kum ka jingïalehkai kaba long man la u snem.
