Nongpoh, Naitung 07: U Conrad Sangma Myntri Rangbah ka jylla mynta ka sngi u la leit ban plie paidbah ïaka jaka kieng lieng haki um kshaid (Rafting) haka shnong Umtham kaba la tip ruh kum ka Whitewater Village naka bynta ban kyntiew ïa katei ka jait jinglehkai bad khamtam ban sei ïaka sap ka phong ñiah lieng jong ki khun samla na katei ka shnong naduh ki heprit bad ïakop sha kiwei ki jaka ka ri ka pyrthei.
Ha katei ka sngi la donlang ruh da ka kong Macdalyne S Mawlong MDC ka Umsning, kong Isawanda Laloo Director Sports and Youth Affair, Arpit Upadhya Deputy Commissioner ka Ri-Bhoi District, Boby L Nongbet District Sports Officer, Ri-Bhoi District, ki nongïalam ka Ri-Bhoi Water Sports and Tourism Co-Operative Society Ltd. ba kynthup ïa u Ian Vincent bad ka Sheela Vincent bad kiwei kiwei ki riew rangbah.
Naka liang u Ian Vincent u la pynpaw baka thong bad ka jingangnud jong ki, ka dei ban pynlong ïa katei ka jaka ha Wah Umtrew haka shnong Umtham kum ka jaka kieng lieng ha katei ka wah kaba khlaiñ bor ban ai jinghikai ïaki heprit bad ki samla kiba na katei ka shnong bad ki shnong ba marjan ban pynmih ïaki rang bad thei ñiah lieng bad ban kyntiew ïa katei ka jait jinglehkai haka jylla kaba ym pat da paw pyrthei bha.
U la ong ruh lyngba katei ka jaka yn pynthikna ruh ba kin mih ki rang bad thei ñiah lieng kiba tbit bad kiba lah ban leit ïakop bad kiwei kiwei ki ri jong ka pyrthei, kumba kila don ruh ki khynnah kiba la shah jied ban leit sha Russia bad kiwei kiwei ki jaka ban leit ïakop.
Naka liang u Myntri Rangbah ka jylla u la pynpaw ka jingsngewkmen ban iohi ba katei ka jaka ka dei kaba biang tam ban pynlong kum katei ka jait jinglehkai kaba dei ruh shibynta ban khring ïaki nongjngohkai pyrthei nalor ka jinglong jingman ka jaka ka long kaba itynnad bad u la ong ruh naka liang ka sorkar kan sa noh ki lad jingïarap sha katei ka jaka ban nang pynbha bad ban kyntiew ïa katei ka jait jinglehkai haka jylla bad kular ruh ban pynbiang ïaka network mobile ha katei ka shnong.
U la ong ruh ba ka sorkar ka don ka jingkyrmen ban pynmih ïaki rang bad thei ïalehkai kumba ka tnad ïalehkai ka jylla mynta kala sdang ban leit man ki shnong ban lum ïaki khynnah donsap ban phah sha ki jaka lehkai ba kham heh haka jylla bad kyrmen skhem ruh ba na katei ka jait jinglehkai kin mih ki nongñiah lieng kiba tbit haka jylla wat ban poi sha ki jingïalehkai ba heh jong ka pyrthei.
