Williamnagar, Jymmang 27: U Myntri Rangbah ka Jylla Meghalaya u Conrad K Sangma, ha ka 27 tarik Jymmang, 2025, u la plie paidbah ïa ka madan phlang plastik (Synthetic Artificial Turf) ha Rongrenggre Playground, Williamnagar, East Garo Hills.
U Myntri Rangbah ka Jylla u la pynpaw ba kane ka madan thymmai kan ai jingmyntoi shibun ïa ki samla jong ka Williamnagar, da kaba kdew ba 25 tylli ki madan kiba kum kine ki dang shna ha kylleng ka jylla, bad ka dang mang ban tei sa 35 tylli kiwei pat ki madan, da kaba thmu ban tei baroh palat 50 tylli.
Kane kan long ka jingkyntiew kaba khraw ïa ka thong jong Ngi ban pynlong ïa ka Meghalaya kum ka nongbah ïalehkai phutbol jong ka ri India’, ong u Conrad.
Haba kren ha ka jingïalang, u Myntri Rangbah ka Jylla u la pynpaw ba ha kine ki hynriew snem ba la dep, ka sorkar ka la pynleit jingmut ban saiñdur bad ïalam ïa ki khynnah samla jong ka Meghalaya lyngba ki polisi bad ki prokram bapher bapher.
“Kawei na ki jingdon jingem ba kordor tam jong kane ka jaka ka dei ki samla jong ngi, bad lada ngi lah ban plie ïa ki lad ki lynti kiba bha, ngi dei ban pynlong ïa ki ban trei shitom khnang ba kin long ki nongshong shnong kiba seisoh jong ka ri.”
Ula kdew ba ka sorkar ka dang trei ha kiba bun ki liang, kynthup ïa ki jingïalehkai, bad pynbna, “Ha u snem 2027, ha ka sien kaba nyngkong, yn pynlong ïa ka National Games hangne,” da kaba bynrap ba ki jingtei jong ki jaka ïalehkai jong ka Meghalaya ki dei ban ïahap katkum ka national standard, ha kaba ïa ka Meghalaya Games ruh yn pynlong ha ka thaiñ.
U la pynkynmaw ïa ka jingïalang jong ka kynhun myntri ha u snem 2018 ha Tura ha kaba la thaw ïa ka polisi ïalehkai, da kaba batai ba ka jingroi ka nang kiew ha ka jingïalehkai bad ba ka jingnang jingstad bad ka jingpyndonkam ïa ki sap ka long kaba kongsan bha na ka bynta ka jingroi jong ka jylla.
U la ong, “Ban pyni ïa kine ki sap, la sdang ïa ka MGMP, ha kaba ki briew shimet ki lah ban pyni ïa la ka sap bad la siew ïa ki na ka bynta kata.” U la kdew ba ka Meghalaya ka don ïa ka jingbun ki samla bad u la ban jur ïa ka jingdonkam ïa ki mat ba pura ban pynkylla ïa ki sha ki nongshong shnong kiba don ka jingkitkhlieh, da kaba pynbna, “Ka jingthmu jong ka sorkar ka long ban wanrah ïa ka Meghalaya sha ka thup Top 10 jong ki jylla ba ha khlieh duh.”
