Shillong, Nailar 14: U Myntri ka tnad Social Welfare Bah Paul Lyngdoh ryngkat bad u nongïalam ka Liang Pyrshah ka ïing dorbar thawaiñ ka jylla u Bah RV Lyngdoh ha ka sngi Thohdieng ki la plie ïa ka Half Way Home Rehabilitation of Persons Living with Mental Illness kaba don ha Saw Mer, Dong Pynthor Upper Shillong bad ïa ka kali kit nongpang ne Ambulance.
Ha kane ka jingïalang la ïadonlang ka Deputy Commissioner ka East Khasi Hills ka Kong RM Kurbah, ka Director jongka ka Social Welfare ka Kong CD Lyngwa, ki nongïalam shnong, ki nongïalam ka KSU bad kiwei kiwei.
Ka Half Way Home ka dei ka jaka sah jong ki Kynthei kiba don jingshitom ha ka bor pyrkhat pyrdaiñ. ïa mynta, ki don 25 ngut kiba sah ha kane ka jaka ban ïoh ïa ka jingsumar bad kine ki dei kiba wan n kylleng ka ri India. ïa kine ki briew la sumar ha kane ka jaka bad hadien ba ki la koit la khiah, kila ïoh ban leit phai noh sha ki ïing ki sem ki jongki.
Haba ai jingkren, u Bah Paul Lyngdoh ula ïaroh ïa ka jingtrei shitom jong ki Ophisar bad ki Nongtrei ka tnad Social Welfare ha ka jingshakri na ka bynta ka bha ka miat jong ka imlang sahlang bad ula pan ruh ïa ka jingkyrshan bad jingïatreilang na baroh.
Ula ong ba ka long lypa kaba eh ban ïatrei bad ki briew kiba biang nadong shadong kumta kan long kaba kham eh shuh shuh pat ban ïatrei khamtam bad ki briew kiba don jingduna ha ka bor pyrkhat pyrdaiñ.
U Bah Paul ula pynpaw ïa ka jingkmen ba ka tnad sorkar ka la trei bha hynrei u pdiang pat ban ïoh ïa kino kino ki jingkynthoh kiba kdew ïa ki jingduna khnang ban lah ban pynbeit noh ïa ki.
U Bah RV Lyngdoh ula ïaroh ïa ka jingshimkhia jong ka Tnad Social Welfare hapoh ka jingïalam u Bah Paul Lyngdoh bad ula ai ka jingïaroh ïa baroh ki nongpeit nongsumar ïa kine ki nongpang ha ka bor pyrkhat namar ka kam kaba ki trei ka long kaba khraw bha bad u ngeit skhem ba u Blei yn sa ai khusnam ïaka jingtrei shitom ka jong ki.
