Amlarem, Risaw, 29: U myntri ka tnad pule puthi jong ka sorkar jylla u ma Lahkmen Rymbui mynta ka sngi ula plie paidbah ïa ka ïing skul ba thymmai jong ka Amtapoh Government Lower Primary School, kaba hap hapoh ka Amlarem Sub-Division, West Jaintia Hills District, ha ka jingdonlang ki ophisar sorkar, ki nonghikai, ki khynnah skul bad ki paidbah nongshong shnong.
Kane ka jingplie ïa ka skul ka long kum ka dak ban kyntiew ïa ka pule puthi ha ki shnong nongkyndong jong ka jylla. Ïa kane ka skul la seng naduh u snem 1957 bad kaba don mynta 131 ngut ki khynnah skul bad 4 ngut ki nonghikai naduh ka Pre-Nursery haduh Class-V.
La sdang ïa ka jingïalang da ka jingduwai bad ka jingkren pdiang burom da u ma Mac Donlad Pohtmi, Secretary jong ka shnong Amtapoh, bud sa ka jingai syntiew bad jingrwai na ki khynnah skul. La pynïaid ïa ka jingïalang da u ma Iangrai Khongiong, Principal, katba u ma Bhun Manar, Rangbah Shnong Amtapoh bad ka Smt. Distarbel Khongiong, Principal, ki la ai jingkren lyngkot ban pynpaw ïa ka jingkmen bad ka jingsngewnguh halor ka jingkyrshan jong ka Sorkar, katba ki khynnah skul jong ka L.P. bad U.P. School ki la pyni ruh da ki drill bad jingshad tynrai.
Ha ba ai jingkren u Myntri ma Lahkmen Rymbui ula pynpaw ïa ka jingiïid lynti jong u ha ka kam pule puthi naduh u snem 2018, da kaba kdew ba ka jingïarap kaba nyngkong eh jong u ka long da ka ?4.5 lak hapoh ka SSA Upper Primary School Fund ha ka shnong Amtapoh. Ula ong, “Phi la jied ïa nga ban ïakhun na ka bynta ki hok jong phi bad ban kitkhlieh ïa ka thaiñ hi baroh kawei”.
U Myntri u la ai khublei kyrpang ïa u Myntri Rangbah ka Jylla u Conrad K. Sangma, uba la buh ïa ka pule puthi kum ka mat ba kongsan tam jong ka Sorkar, da kaba pynpaw ruh ba ka jingstad pule (literacy rate) jong ka Meghalaya ka la kiew palat 90% lyngba ka jingïatreilang jong baroh ki liang. U la pynbna ruh ba ka Mission Education-4 kan sa sdang shen ban pynbha ïa ki jingtei na ka bynta ki skul sorkar, kaba kynthup ruh ïa ka Umladkhur bad Lamin Government L.P. School.
U la pynpaw ruh ba ha kine ki 7 snem ba la leit, ka Sorkar ka la pynkhlaiñ ïa ka jingai scholarship sha ki khynnah skul — da ka Chief Minister’s Scholarship Scheme kaba ai ?6,000 sha man u khynnah shi snem bad kumjuh ruh kiwei ki skhim kum ka Post-Matric bad Border Area Scholarship kiba long haduh ?30,000–?35,000 shi snem.
U Myntri u la pynbna ruh ba haka 31 tarik u Risaw, 2025, ka Jylla Meghalaya kan sa plie ïa ka Engineering College kaba nyngkong eh jong ka bad ka jylla ruh ka la don ïala ka jong ka University, kaba pyni ïa ka jinglong jingmut jrong jong ka Sorkar ban kyntiew ïa ka pule puthi.
Ha ka jingkren jong u, ula kdew ruh ïa ka jingdonkam ban pynbeit ïa ka jingdon nonghikai bad khynnah skul, da kaba ong ba ka Amtapoh L.P. School ka don 131 ngut ki khynnah bad 4 ngut ki nonghikai, katba kiwei ki skul kiba rit ki don tang 5 ngut ki khynnah bad haduh 3 ngut ki nonghikai. U la ong ba ka Sorkar ka la sdang ban pynbeit ïa ki Grant-in-Aid, Salary bad SSA structures bad ka SSA Scheme kan kut ha u Lber 2026.
U Lahkmen Rymbui ula pynpaw ruh ba u la ïoh pdiang ïa ka Memorandum na ka Amtapoh Village halor ka jingdonkam ka um bam ba biang bad u la ong ba haba ka Jal Jeevan Mission (JJM) ha ka kynhun kaba nyngkong kam shym la treikam pura, hynrei ha ka Second Phase la khmih lynti ban lah ban pynbeit ïa kane ka jingeh.
U la kdew ruh ïa ka jinghiar ka kamai ha ka jingthung symbai (broom cultivation) bad u la kyntu ïa ki samla ba kin shim kabu na ka PRIME Hub ha Shkentalang ban sengkam lajong bad ban long ki nong-ïalehkai na ka bynta ka ïoh-kam ïoh-jam.
U la pynbna ruh ba ula ai ?5 lak na ka MLA Scheme bad ?1 lak na ka pla la jong ka ban pynkhreh ïa ka Jingïaseng Nongtrei jong ka Balang Church of God Meghalaya-Assam ha u snem 2027. U Myntri ula pynkut da kaba ong ba ka “jingkylla kaba bha ka shim por, hynrei kaba donkam ngin trei lang da ka jingngeit bad ka jingkyrmen.”
