Shillong, Risaw 14: U Myntri ka sorkar pdeng ba dei peit ïa ka tnad ka koit ka khiah u Dr. Mansukh Mandaviya u la wan sha Shillong ha kaba u la plie hynniew tylli ki jingtei hapoh NEIGRIHMS hospital Shillong bad u la buh ïa u mawnognrim ban shna ïa ka Critical Care Hospital kaba 150 jingthiah na ka skhim PM-ABHIM.
Ki phra tylli ki jigntei kiba la plie mynta ka sngi da u myntri ka sorkar pdeng ki long, ka iing jong ka Medical College bad Hostel, ka Regional Cancer Centre, ka Nursing College bad Hostel, Module Operation Theaters, Virtual Autopsy Facility bad ka ïing basa kaba thymmai.
Haba kren ha ka jingïalang kaba la long ha Auditorium u myntri ka sorkar pdeng u la ong ba ka thong jong ka sorkar pdeng ka long, “Phin shah sumar ha India bad wan shah sumar ha India” dei halor kane ba ka sorkar pdeng kala shim ïa ki lat ki lynti ban kyntiew ïa ka koit ka khiah ha baroh ki liang da kaba pynbun shuh shuh ïa ki seat ban pule Doktor.
La ïathuh ba namar ka Ri Japan ka don kam ïa ki nurse ban trei ha katei ka ri haduh 5000 ngut bad ki da kwah da ki nurse na North East, dei halor kane ka nongrim ba la plie ar tylli ki Nursing College ha Guwahati ban ailad ïa ki samla pule nalor ba ki kren ïa ka ktien jong ka Pyrthei ka ktien phareng, kan bha ruh ban nang ïa ka ktein Japan.
Haba ïa dei bad ka jaka pule Doktor bad pule Nursing ha NEIGRIHMS la ong ba mynta yn pynkiew noh ïa ka jingbun ki seat ban pule na ka 50 seat ha ka MBBS bad 50 Seat ha ka Nursing sha ka 100 seat ha ka MBBS bad 100 seat ha Nursing kane ka long ban pynïoh bun ki doktor na ka bynta ban pynkhlaiñ ïa ki lad jingsumar.
Kane ka Regional Cancer Centre kaba la plie mynta kan don 250 jingthiah bad kan don ïa ki kor ki bor kiba katkum kane ka juk kaba mynta, la ong ba ka sorkar pdeng kan pynbiang ïa ki jingdon kam kane ka hospital namar ha kane ka jaka ki Ri ba Shathie jong ka dewbah Asia ruh kin wan ban sumar.
Ha kane ka sngi la pdiang burom ïa u myntri ka sorkar pdeng ba dei peit ïa ka koit ka khiah da u Director ka NEIGHRIHMS, ha ka jingïadon lang u MLA kane ka jaka Mawryngkeng bah Heaving Stone Kharpran , ha ka jingïadon lang ki heh kane ka hospital bad jong ka sorkar jylla.
