Nongstoiñ, Risaw 6: Mynta ka sngi kawei na ki seng trei mon sngewbha kaba la tip kum ka Nongstoiñ Social Service Society, ka la ïoh ban buh ïa u Mawnongrim na ka bynta ban tei ïa ka ïing paka, kum shi bynta ban pynlong ka jaka ai jinghikai kyrpang na ka bynta ki khynnah, ba kin nang bad tip ïa ki jingtrei bapher bapher lyngba ki sap ki phong kaba ki don, kaba kynthup lang ruh ïa kiba duna ha ki dkhot met.
U bah Macmillan Byrsat MLA ka Nongstoiñ, u la long u kongsan ha kaba u la ïoh ruh ban plie paidbah ïa utei u Mawnongrim na ka bynta katei ka jingtei ïa kaba la tip kum ka, ‘Construction of Vocational Training Centre’. Ha kajuh ka sngi la rakhe ruh ïa ka, ‘World Mental Health Day 2022’, kaba dei ka sngi kyrpang jong kiba duna ha ka pyrkhat pyrdaiñ.
U Fr Rolandus Lyngdoh President ka NSSS haba ai jingkren, u la ong ba ïa katei ka jingtei la ïoh pisa na ka Chief Minister’s Special Development Fund 2021-22, lyngba ka jingïarap jong u MLA jong ka Nongstoiñ u bah Macmillan Byrsat kaba la kot haduh 35 lak tyngka.
U Rev Anselm Nonglang Diocesan Administrator Diocese Nongstoiñ, u ba la long ruh kum u symbud kongsan, u la ong ba ka balang ka don la ka thong ban shakri ïa ki paidbah ym tang ban sharai ha ka jinglong mynsiem da kaba pyndep ïa ka baptisma ne ban shu ïalap tang ïa ka Ktien U Blei. Hynrei ban khmih ruh ïa ka jingdonkam jong u khun bynriew haba ïadei bad ka doh.
Na ka liang u kongsan haba ai jingkren, u la ïaroh ïa ka balang katholik da kaba ong, “Nga kren ïa ka jingshisha ba wat haba ki khristan ki don tang kumba 2 percent ha ka ri India baroh kawei. Hynrei, ka jingnoh synñiang jong ki khristan lyngba ka balang katholik ha ri baroh kawei ka la kot sha ki 40 ne 50 percentage lyngba ka pule puthi”.
Ha kaba ïadei bad ki briew kiba duna ha ka bor pyrkhat, u la ong, “Kam dei ïa ngi ban ñiew ïa kiwei pat ba ki long kiba duna. Hynrei baroh ngi long kiba duna bad ka dei ruh ïa ngi ban don ïa ka mynisem ka ban pyndem, namar da ka jingpyndem ngin jop ïa ki jingeh”.
Haba ïadei pat bad ka jingkypad jong ka NSSS ban siang rong noh ïa ka surok kaba ïaid lyngba ka surok PWD ka ban poi sha NSSS, na ka liang u MLA u la kular da kaba u la ong ban phah leh noh shen ha kine ki sngi ban wan.
Ha kane ka sngi la synran lang lang ruh ïa u kongsan da u Rev Anselm Nonglang Diocesan Administrator Diocese Nongstoiñ, u Fr Rolandus Lyngdoh President ka NSSS, u Fr James Anderson Syiemlieh Director ka NSSS, ki ophisar sorkar bad kiwei kiwei. Nalor katei ka jingïalang, la ïoh ruh ban pyllait paidbah ïa ka Kali na ka bynta ka NSSS kaba la kyrshan da ka Kindermissionwerk Germany.
