Nongpoh, Risaw, 02: Ka long ka jingkmen ïa ki paidbah nongshong shnong ka shong Kyrdemkulai 6 km ha Ri Bhoi District ha kaba da ka jingshim khia ka HDFC bad ka Society for Action on Community Health (SACH) la lah ban plie paidbah noh ïa kawei ka E-learning center bad kumjuh ruh ka Turmeric Processing Unit ha ka 29 tarik u Nailur 2023 hapoh ka shnong Kyrdemkulai ha Ri Bhoi.
Kum ban pynpaw paidbah, ïa katei ka eLearning Centre bad ka Turmeric Processing Unit la pyntreikam da ka Society for Action on Community Health (SACH) lyngba ka HRDP Project bad la bei tyngka pat da ka HDFC Bank kum kawei na ka Bank ka la kham paw bha ha ka jylla.
La wan ruh ban plie ïa katei ka E-learning Centre bad ka Turmeric Processing Unit da u MLA ka Umsning Constituency, u Dr. Celestine Lyngdoh kum u kongsan bad la sakhi lang ruh da ka jingdon lang u Bah Rocky Marweiñ, uwei na u samla rangbah ka thaiñ Umsning, u Rangbah shnong ka Shnong Kyrdemkulai 6km, u Bah Pynshngaiñwell Kharnaior, u Branch Manager ka HDFC Nongpoh Branch u Jayanta Mudoi, ka Assistant Branch Manager, ka Kong Ibadahun Kharkongngor, ka President ka Village Organization Kyrdemkulai 6km bad kynthup ruh ki longkmie bad ki riew rangbah katei ka shnong.
Kumba la pynpaw ha katei ka sngi, ïa katei ka Turmeric Processing Unit yn pyntreikam da ka Village Organization Kyrdemkulai 6km bad ïa katei ka E-learning Centre pat yn pynïaid da ka Shnong lyngba ka Committee ba la thung kyrpang da ka Shnong.
Haba kren ha kane ka sngi kum u kongsan, u Dr, Celestine Lyngdoh, MLA ka Umsning Constituency u la ai ka jingïaroh ïa ka HDFC Bank bad ruh ïa ka SACH, namar dei lyngba ka jingïatrei ryngkat kine ki ar kynhun ba la tip kum ka CSR la lah ban wan rah ïa katei ka E-learning Centre bad ruh ïa ka Turmeric Processing Unit hapoh katei ka shnong kaba long ka jingmyntoi ïa ki paidbah nongshong shnong.
U la ong ruh ba ka long ka jingkmen ban ïohi ba ha kane ka shnong la don kata ka E-learning Centre bad kumjuh ruh katei ka Turmeric Processing Unit, ha kaba kine ki urlong ka dei lyngba ka jingdon kum kitei ki Company ba ki ïarap ban ieng ha la ki jong ki kjat ban kyntiew ïa ka ïoh ka kot bad ka roi ka par jong ki nongshong shnong khamtam sha ki shnong nongkyrndong.
Shuh shuh, u la ong ruh ba na ka liang jong u kum u rangbah shnong un dang ai ïa kata ka jingïatrei lang na ka bynta ban dang pynbit pynbiang ïa ki jingdonkam jong ki paidbah nongshong shnong hapoh kane ka shnong bad kum ki paidbah ruh ki dei ban ïa snoh kti lang khnang ban dang wan shibun ki kam pynroi hapoh kane ka shnong kaba long ka jingmynti ïa ka shnong hi baroh kawei, u la bynrap.
