Nongpoh, Naitung 23: Na ka bynta ban dang kyntiew ïa ka pule ka puthi ki samla pule ha kaba nalor ka Arts bad Science Stream, ka St. Savio Higher Secondary School, Baridua mynta ka sngi ka la plie paidbah ïa ka Science Laboratory hadien ba kane ka skul ka la wan rah sa ïa ka Science Stream.
Ïa kane ka Science Laboratory la wan ban plie paidbah da u MLA ka Jirang Constituency, u Bah Sosthenes Sohtun kum u kongsan bad la sakhi lang ruh da ka jingdon lang ka District School Education Officer ka Ri Bhoi ka Ruby Das, ka Sister Molly Thomas, Principal ka St. Savio, ki phadar bad kynthup ruh naduh ki nonghikai bad ki khynnah skul katei ka skul kaba dei kawei na ka skul ba don ha khappud Meghalaya bad Assam.
Haba plie ïa kane ka skul la pynphuh pynphieng ruh da ki jingrwai bad ki jingshad ki khynnah skul, kiba la pyni ïa ka sap ka phong jong ki ha ka kam rwai bad ruh ki kam shad, nalor ka kam kaba ki pule na ka bynta ban lum jingstad na kane ka shlem wad jingstad ki khynnah skul ba la pynïaid da ki Sister SMMI.
Haba kren ha kane ka sngi kum u kongsan, u MLA ka Jirang Constituency, u Bah Sosthenes Sohtun, u la ai jingïaroh ïa ki bor pynïaid skul kane ka skul, namar baroh kine ki urlong ha kaba kyntiew ïa ka jingnang jingstad kaba ïa dei bad ka sobjek saïan ka dei lyngba ka jingtrei shitom bad ka jinglen jong ki bor pynïaid skul.
U la ai khublei ruh ïa ki khynnah skul ha baroh lai tylli ki stream kata ka arts, commerce bad science stream ba ki dei ban trei shitom, namar dei lyngba ka jingtrei shitom ha ki jingpule ba kin lah ban pas sha ki kyrdan kiba shaneng kaba long ka burom ym tang ïa lade bad ïa ka ïing ka sem, hynrei ka skul bad ïa ka imlang ka sahlang hi baroh kawei.
Shuh shuh, u la bynrap ruh da kaba ong, ba kane juk ba mynta ka la dei ka juk stad bad ki jingkylla kiba bun bad ban poi sha ka thong bad ka nam, ka dei tang kito ki samla ba ïaineh bad kiba trei shitom, namar ka jingtrei shiotom jongki, ka dei ka bynta kaba ngi lah ban kyntiew ïa ka pule ka puthi ha ka dong ka thain bad ha ka jylla hi baroh kawei.
