Plie u MLA ïa ka ïing skul jong ka Pdengkarong Govt. LP School, ha jinglut ba 44 lak tam

Jowai, Nailur 30: U MLA ka 7-Amlarem Constituency ma Lahkmen Rymbui uba dei ruh u Chief Adviser ka sorkar jylla, mynta ka lah sngi U Blei 30 tarik u Nailur ula plie ïa u Maw Nongrim jong ka Building ba thymmai ka skul Pdengkarong Govt. L P. School West Jaiñtia Hills District.
Ïa kane ka skul la tei ha ka jinglut kaba Rs. 44,97,448/ Tyngka, langba ka jingïarap pisa na ka thad pule puthi kaba hap hapoh Mission Education Phase II.
Ka jingïoh ïa kane ka skul building thymmai ka dei lyngba ka jingtrei shitom jong u Waheh Shnong u ma K. Pohshna uba la pynsngew sha u MLA ïa ka jingdonkam jong ki kam pynroi hapoh ka shnong ka thaw, la ong ruh ha u snem 2018 ka shnong kala ïoh ïa ka surok ba bha kaba pynïasoh haduh Amlarem bad lyngba kane ka surok kala ïarap shi katdei eh ïa ki nongshong shnong haka ïaid ka ïeng.
Napdeng ki 39 tylli ki skul kiba don hapoh ka thaiñ Amlarem, kane ka skul ha Pdengkarong kala ïoh kyrpang ïa kane ka skim bad kala long ka jingmyntoi kaba khraw eh ha ka liang ka jingai jingnang jingstad ïaki khynnah skul.
Ïa ka jingïalang ha kane ka sngi la pynïaid da u Waheh Shnong ka Pdengkarong ma K. Pohshna, la ïoh ruh ka jingkren pdiang na u ma Silverstar Sumer (Head Teacher) haka jingdonlang u ma C. Lamin SDSEO Amlarem (DI), ma Lamdibok Sumer Ex MDC, ki khynnah skul, ki Nonghikai nalor kiwei de.
Na ka liang u kongsan ma Lahkmen Rymbui haba ai jingkren ula pynsngew kane ka ïing skul Pdengkarong ka dei ka shlem ai jinghikai kaba la rim bha ha ka thaiñ War Jaiñtia bad ka don ruh sha ki thaiñ kyndong, hynrei ha kine ki 15 snem kala kylla dur da ka jingtreilang jong ki nongshnong shnong.
Ula kyntu kum ki khynnah skul ki dei ban don ka mynsiem trei shitom dalade hi khnang ba kin lah ban poi sha ka thong jong ka jing jop, ula buh ruh ka jingkyntu kum ki nongshong shnong kim dei ban shah ïalam bakla khamtam haka liang jong ka synshar khadar, da kaba kyntu ban peit ïa ki kam kiba u MLA ka thaiñ ula trei shitom ban wanrah ki kam pynroi ha kiba bun ki liang, wat ïa u surok Pdengshakap mynta la dep sanction pisa 10 klur shen ka kam kan sa sdang noh, nalor ki jaka sumar bad kiwei de.
La pynphuh pynphieng shuh shuh ïa kane ka sngi da kj jingrwai, ki jingshad na ki khynnah skul, ki seng samla, ki seng longkmie bad ki SHG jong ka shnong.
Kumba long mynta kane ka skul ka dang donkam ban pynbha shuh shuh ïa ka naduh ki kynroh, ki paiñkhana, ki jaka buh kot (Library) bad ban pyntreikam ïa u UDISE Number na ka bynta ka lawei jong ki khynnah skul.