Nongpoh, K’Lyngkot 09: Wat hadien ka jingap khmih lynti ïa ka jingwan poi jong ka Droupadi Murmu ka President ka Ri India ban plie paidbah ïa ka jingrakhe dap 50 snem jong ka ICAR Research Complex for North Eastern Hill Region, bad kumjuh ruh ka iew pyni nam ki nongrep ba la tip kum ka Farmers Expo hynrei ka President jong ka ri India kam shym la lah shuh ban poi ha katei ka sngi na ki daw bym lah kiar, bad ïa katei ka jingrakhe la wan ban plie paidbah noh da u lat ka jylla u C.H Vijayashankar bad u Shivraj Singh Chouhan, myntri ka tnad ka rep ka riang jong ka sorkar pdeng bad ïa ka jingïalang la pynlong ha MS Swaminathan Conference Hall jong ka ICAR ha Umïam.
Ha kane ka sngi la sakhi ruh da ka jingdonlang u Conrad Sangma Myntri Rangbah ka jylla, ka kong Ampareen Lyngdoh Myntri ka tnad ka rep ka riang ka jylla, u Himanshu Pathak Secretary DARE bad Director General ka ICAR New Delhi bad kiwei kiwei ki heh sorkar jong ka jylla.
Haba kren ha katei ka sngi na ka liang u Conrad K Sangma Myntri Rangbah u la pynpaw ka jingsngewkmen ban shim bybta lang ha katei ka sngi ka jingdap 50 snem jong ka ICAR RC NEH Region halor ka jingshakri kaba katei ka shlem ka la ai sha ki paidbah ha kine ki 50 snem ba la leit noh ban long kum ka nongtbeh jingshai bad wanrah ki jingkylla ha ka rep ka riang ha ka thaiñ Shatei Lam Mihngi bad kumjuh ruh ka jingim jong ki nongrep.
U la ai ruh ka jingïaroh ïa ki nongtrei, ki nongwad bniah jong ka ICAR kiba la trei shitom ban pynkupbor ïa ki nongrep lyngba ki tiar ki tar bad ki rukom rep katkum ka juk stad ba mynta bad khamtam ban pynsuk ruh ïa ka ïew ka hat jong ki nongrep.
U la ong ruh lyngba ka jingdon jong ka ICAR ka la long ka jingkyrkhu ïa ki nongrep ha ka jylla bad ka thaiñ Shatei Lam Mihngi ba ki nongrep ki lah ban kyntiew ïa ka rukom rep na uwei u snem sha uwei pat khamtam ka rukom pynmih ïa ki mar rep bad ka lyngba ka jingshimkhia jong ka sorkar, la lah ruh ban shalan ïa ki mar rep kum u sohtrun, sohñiamtra sha kylleng ki ri ka pyrthei.
Na ka liang u Myntri ka Sorkar Pdeng u Shivraj Chouhan haba kren ha katei ka sngi u la ai jingïaroh ïa ka jylla Meghalaya bad kumjuh ruh ki jylla ha ka thaiñ Shatei Lam Mihngi, bad ka jylla Meghalaya ka don ruh ka don ruh ka lad ban long kum kawei na ki shlem jong ki soh bad ki jhur ha ka jylla.
U Shivraj Singh Chouhan u la ong ba ka jingriew spah jong ka jylla Meghalaya ha ka jinglong ka mariang ka dei ka lynti kaba hap ban trei khlem shongthaid bad donkam ban don ka jingïatreilang kaba kham bha hapdeng ka ICAR, ki skulbah jong ka rep ka riang, ki KVK, bad ki tnad sorkar jylla bad ka jylla Meghalaya ka don ruh ka lad ban long kum kawei na ki jylla ba lah ban pynmih bun u jhur bad ki soh ki pai lyngba ka jingdon jong ka ICAR.
U CH Vijayashankar u la ong ba ka ri India ka dei ka ri kaba bun ki nongrep bad ka rep ka riang ka shong ha ka dohnud jong ki paidbah, u la ban jur ba ka ICAR ka don ha khmat eh ha ka jingwad bñiah bad jingpynroi ha ka ri na ka rep ka riang, ka thung ka tep bad ka ri jingri kiba la pynkiew bad pynmyntoi ïa ki nongrep ha ka thaiñ, bad kane ka jylla ka dei ruh kaba riew spah ha ka jingpynmih ïa ki mar rep naduh u sying, u shynrai bad kiwei kiwei ki mar rep.
U la ai ruh ka jingïaroh ïa ka ICAR RC NER kaba la jam ïa u mawmer ba 50 snem ka jingïaid lynti ban long kum kawei na ki shlem ban ai ka jingshakri bad kyntiew ïa ka rep ka riang bad ka jingpynmih ïa ki mar rep ha ka ri bad khmih lynti ba shibun ki jingkylla kin wan ha ka liang ka rep ka riang ha ki sngi ban dang wan.
U Lat ka jylla, ryngkat u Myntri ka Sorkar Pdeng, u Myntri Rangbah ka jylla bad kiwei kiwei ki la pyllait ïa ki lai tylli ki kot ha kaba ïadei bad ka rep ka riang, ka video bad kumjuh ruh la ïoh ban plie paidbah syndon ïa ka jaka sah jong ki nongrep kiba dang shah hikai kaba don ha Imphal, Manipur.
