Plie u DC ka West Jaiñtia Hills ïaka prokram District Level Nasha Mukt Bharat Abhiyaan

Jowai, Jylliew 02: U Deputy Commissioner ka West Jaiñtia Hills District u Abhinav Kumar Singh, IAS mynta ka sngi 2 tarik u Jylliew ula plie paidbah ïaka District Level Nasha Mukt Bharat Abhiyaan campaign, ha ka jingïalang bala pynlong ha training hall ka DC office, Jowai.
Ïa kane ka prokram la ïasnohkti naduh ka ophis u Deputy Commissioner bad ka District Social Welfare Officer, Jowai ha ryngkat ki kynhun treimon sngewbha NGOs kiba dei ki Member Selected ba ju kyrshan daka Ministry of Social Justice and Empowerment jong ka sorkar India, halor ka phang “Substance Abuse -Prevention Treatment and Rehabilitation”.
Na ka liang u Abhinav K. Singh haba ai jingkren ula ong ka por kala dawa bha ban tehlakam na ki jingdih pynbuaid hapoh ki shnong ki thaw. Kumta ka donkam eh ïa ki shnong ki thaw ban ïatreilang bad ka sorkar. U kyrmen lyngba kane ka prokram kaba ïatreilang da ki tnad sorkar happoh ka West Jaiñtia Hills District ki lah ban pynïaid shakhmat ban pylliat ïa ka Ri na ka jingdih pynbuaid kum u Drug.
Ha kane ka prokram yn pynlong ïa ki jingïakop bapher bapher kum ka jingdro dur, marathon bad ki jingïalehkai surok (street play). Ula pyntip ruh kin don ki prokram ai jinghikai ha kylleng ka District kum ka lad ban pynsngewthuh khambniah sha ki paidbah nongshong shnong.
U Additional Superintendent of Police u Ishan Gupta, IPS ula pynsngew halor ka jingdonkam ban tehlakam ïa ka rukom pyndonkam ïa u Drug, ula ong ruh ka jingkynrei kum kine ki jait pyndonkam ba sniew ka ktah ym tang ïa ka Ri hynrei wat hapoh ki shnong jong ka District naduh ki jaka sor haduh ki jaka nongkyndong. Kumta kaba donkam eh ban ïakhun katba lah ban pynduh jait ïa u Drug.
Ïa ki prokram bapher bapher yn pynïaid ha ryngkat ka jingïatreilang ka Social Welfare department, Police Departments, District Medical & Health Officer (DM&HO), District Legal Service Authority (DLSA), Sports Departments, ka NGO groups Breakthrough, Khliehtyrshi, ka Society for Urban and Rural Empowerment (SURE) bad ka Mihmyntdu Communities Social Welfare Association (MCSWA) Jowai.
Ha ka jingïalang bala pynlong mynta ka sngi la ïadonlang da u Brand Ambassador ka Nasha Mukt Campaign u Chibait Langstang, ka Dr. JN Chullai Director MCSWA, u ma C.S Laloo, Rtd. Controller Legal Metrology, Jowai bad ka kong Y. Najiar, District Social Welfare Officer, Jowai.