Plie u DC ïa ka ‘Halfway Home for Rehabilitation’ ha Sabahmuswang
![](https://mawphor.com/wp-content/uploads/2023/06/1-Copy.jpg)
Jowai, Jylliew 27: U khliehduh ka District u bah B.S. Sohliya Deputy Commissioner ka West Jaiñtia Hills District mynta ka sngi ula plie ïa ka jaka sah shipor ïa kito ki briew kiba dang shu mih na ki jaka sumar na ka jingshah khtah ha ka bor jingmut jingpyrkhat, hashwa ban kin leit phai sha ki ïing ki sem bad sha ka imlang ka shalang.
Ïa kane ka jaka sah shipor la tip kum ka ‘Halfway Home for Rehabilitation of Person Living with Mental Illness’ kaba don ha Sabahmuswang WJHD, ïa kaba yn khmih bad peit da ka Society for Urban & Rural Empowerment (SURE) lyngba ka jingïarap pisa jong ka Directorate of Social Welfare jong ka sorkar jylla.
Hashwa ban plie la don ka jingïalang kaba lyngkot ba khrum jong katei ka Building, ha ka jingdonlang naduh u kongsan bah B.S. Sohliya, ka kong C.D. Lyngwa Director Social Welfare Department, kong J. Synnah District Social Welfare Officer, ka DSP kong W.C. Lyngdoh, u Secretary ka SURE ma H.H. Mohrmen, ka Dr. A.N. Paswet, ki nongtrei jong katei ka Halfway Home bad kiwei de.
La pynsngew ba kane ka jaka sah kan pdiang kyrpang ïa kito ki nongpang kiba dang mih na ki jaka sumar kum na SANKER bad hashwa ba kin leit phai sha ïing ki dei ban hap ïoh shwa ïa ki rukom ai jinghikai ïa ki naduh ki jait jingshna, ki Counseling, ki dawai dih ba la bthah da ki doctor hapoh kane ka Halfway Home kaba don ïa ki nongtrei (Staff) haduh 16 ngut.
U bah Sohliya ula ong mynta kila don ki lad ba biang ban ai jingsumar ïa kito ki briew kiba pang ha ki jingmut jingpyrkhat, ym shuh kumba long ha ki por mynshwa kiba long kum ki along ban set sumar ïa ki, ula ai khublei halor ka jingsbun jong ka shnong Sabahmuswan ban tei ïa kane ka jaka sumar bad kane ka long ka nuksa ïa kiwei de ki shnong.
Ula kular ba na ka liang ka ophis jong u, ka Social Welfare bad ka SURE kin ïaleh shitom kumno ban pynbha ïa kane ‘Halfway Home’ da ka jingïamir jingmut lang, khnang ba ki nongtrei kin ïoh mynsiem ban trei ïa ka kam bad u kyrmen ba kan long ka nuksa ba bha ïa kiwei de ym tang hapoh ka District hynrei ha ka jylla hi baroh kawei, ula ong.
U ma H.H. Mohrmen ula ai ka jingïaroh ïa ka ophis Social Welfare kala la ïarap ban pynïoh ïa ka jaka ba biang ban shna ïa kane ka ‘Halfway Home’, ula ong ba ïa kane ka Project ka dei ban leit sha Tura hynrei lyngba ka jingtrei shitom jong ki ophisar la lah ban wanrah ïa ka hapoh ka West Jaiñtia.
Shuh shuh ula ong ‘ba ka jingshakri kaba ngin ai sha ki para briew ka dei ka jingduwai bah’ bad ula pynshai shaphang ka jingmut jong ka SURE kaba don saw dak bad u dak ba khadduh E kaba mut Empowerment bad kata ka long ban ai bynta lem ïa kiwei ba ki ruh kin kiew shaphrang.
Ka kong C.D. Lyngwa Director Social Welfare Department ha ka jingkren kala ong lyngba ki nongtrei jong kane ka Halfway Home kiba la jied ïa kane ka kam kan long shisha ka jingkyrkhu na ka bynta kito kiba donkam jingïarap na kane ka jaka.
Kala ïathuh halor ka jingkyrduh kam jong ki khun samla ka jylla bad kawei na ki daw ka dei lyngba Board jong ngi namar kiba bun hi haba ki leit Interview kim ju pass, haba ïa nujor bad ki ICSE, CBSE da kaba ai nuksa ïa ka jingïapher ba ka MBOSE ka kynthup tang khyndiat ki Chapter haba ïa nujor bad ka ICSE, CBSE namar kine ki don jingmut beit ïa ka IIT.
Hadien kane ka prokram u kongsan ha ryngkat ki ophisar kila leit jngoh ïa ki kamra sah kiba don hapoh ka Halfway Home kaba kynthup naduh ka ophis, ki jingthiah, ki jaka sum, jaka bam nalor kiwei de.