Jowai, K’Lyngkot 23: U Myntri Rangbah ka jylla u Conrad K. Sangma mynta ka sngi u la wan ban plie ïa ka PRIME Hub kaba don ha shong Wahiajer West Jaiñtia Hills District, ha ka jingïadonlang ki ar ngut ki symbud myntri ka jylla u ma Sniawbhalang Dhar bah Prestone Tyngsong ryngkat kiwei de ki myntri sorkar bad MLA, CEM JHADC, MDC bad ki sahep sorkar.
Kane ka PRIME Hub ka dei kaba la don lypa ka ïing treikam ka jong ka ha Thadlaskeiñ C&RD Block bad kane kaba dang shu plie ka dei kaba don ki jaka ai jinghikai, ka karkhana treikam bad ka Cold Storage ban buh ïa ki mar ki mata ban lait na ka jingpyut. Ha kane ka jaka yn sdang ban shna ïa u Synsar ha ryngkat ki kor ki bor ban pynstet ïa ka kam.
Kum ban shu pynkynmaw kane ka long kaba ar ha Ri-Lum Jaiñtia ha kaba nyngkong ka don ha Laskeiñ. Kane ka PRIME Hub nalor ka jingai jinghikai kan ïarap ruh kumno ban pynïaid ïew ïa ki mar ki mata.
U Conrad Sangma haba kren u la ong ruh ba ïa kane ka PRIME Hub la lah ban pyndep tang hapoh katto katne bnai kaba juh shim por haduh 8 bnai bad ka jinglut ka long haduh 4 klur tyngka. Na ka liang jong u myntri rangbah u dap da ka jingsngewkmen ba ha kane ka jaka la ïoh ban pyndonkam da ki bor jong ka sngi ne ka Solar Energy.
