Plie u CM ïa ka jingrakhe dap 100 snem ka Dorbar Shnong Chutwakhu, Jowai

0

Jowai, K’lyngkot 10: U Myntri Rangbah duh ka jylla u Conrad K. Sangma mynta ka sngi Thohdieng 10 tarik u Kyllalyngkot, 2025 ula wan ban plie pyrda ïaka sngi sdang jong ka jingrakhe dap 100 snem ne ka ‘Centenary Jubilee Celebration’ ka Dorbar Shnong Chutwakhu, Jowai haka jingïalang bala pynlong ha madan Jrisaleiñ, Jowai.
Ha kane ka sngi la don lang da u Symbud Myntri Rangbah ka jylla u Bah Sniawbhalang Dhar bad u Bah Wailadmiki Shylla (MLA) uba dei ruh u Chairman ka MUDA kum ki symbud kongsan kiba la ai ruh ka jingïaroh kaba khraw eh ïa ka Dorbar Shnong Chutwakhu kaba la jam mynta shaduh une u mawmer ba 100, kiwei de kiba donlang ki kynthup ïa u MLA ka Amlarem u Bah Lahkmen Rymbui, ki ophisar sorkar nalor kiwei de kiba la shah khot sngewbha.
U Conrad K. Sangma haba ai jingkren ha kane ka sngi ula pynpaw ka jingïaroh ïa ka nongïalam bad rim jong ka shnong bad kumjuh ïa kiba mynta kiba la pynïaid shakhmat ïa ki kam ki jam haduh bala poi kane ka jingdap 100 snem.
U la ai ka jingïaroh ïa kane ka shnong kaba la don bynta ha ki por ba ïakhun ïaka kham Covid-19 da kaba synñiang jingïarap haduh 50 hajar tyngka sha ka Chief Minister’s Relief Fund.
U Myntri Rangbah ula pynpaw ruh ka jingïaroh ïa ka sor Jowai kaba la iphuh iphieng bha mynta na ka jingpynkhreh ïaka ‘Meghalaya Games’ ka ban sa long ha une u bnai, da kaba ong ha kine ki snem bala dep ki rangïalehkai na Jowai kila hap ban leit ïashim bynta kum sha Tura bad sha Shillong, hynrei ha kane ka snem kitei ki nongïalehkai na kiwei pat ki District kin ïoh lad ban wan ïalehkai sha Jowai.
Ha kane ka sngi kum ka dak ban ïarap ïa ki Sports Clubs bad ki Associations napoh ka West Jaiñtia Hills District ki ban pynkhreh ïa ki jingïalehkai bapher bapher ha kane ka Meghalaya Games, u Myntri Rangbah ula aiti ha u Bah Wailadmiki Shylla ïa ki cheque kaba mar 1 lak tyngka sha ki 21 tylli ki Sports Clubs bad ki Associations.
U Myntri Rangbah ula pynher ruh ïa ka lama jong ka shnong kum ka dak jong ka jingsdang ban rakhe, da kaba pynbna paidbah bala plie ïa kane ka jingrakhe ‘Centenary Jubilee Celebration’ bad haka juh ka por ula plie pyrda ïa u maw sahnam jong kane ka jingrakhe.
Haba phai khyndiat shaphang ka Dorbar Shnong Chutwakhu, Jowai la seng ïa ka haka snem 1925 hapoh ka jingïalam jong ki Rangbah bad ki Samla kum ki jong u Mr. O. H. Rease (Omil Haris Shullai), Mr. Lomiwell Shylla bad Mr. Phelickstone Rymbai bad kiwei de ki Rangbah, ka dong Chutwakhu ka la seng ia ka Club La jied ïa u Katmon Dome ban long u President jong kata ka Club bad u la neh ha kane ka kam haduh ka snem 1938 (lait noh u snem 1930 ba la seng ïa ka Chutwakhu Society bad la thung President ïa u Woh Dabit Laloo.
Ha ka jingïalang jong ka Dong kaba la long ha ka 4 February, 1930 la seng ïa ka Society bad la pynkylla noh ïa ka Chutwakhu Club sha ka Chutwakhu Society ka ban peit bad pynïaid lang ïa ki kam ba bunjait ka dong ha ka imlang sahlang.
Da ka jingdawa ka kam bad khnang ba ka nym long ka jingban khia ïa ka Ophis jong ka Club bad ha ka juh ruh ka por khnang ban ailad ïa ki samla ba kin ïa shim bynta ha ki kam bapher bapher jong ka Club, naduh ka snem 1988 haduh ka snem 1999, la pynmih ruh sa kiwei ki Branch Committee kum ka Sports & Youth Affairs, Education, Vigilance, Registration, Music, Art & Culture, Counselling & Finance Committee.
Na ka bynta ka shongsuk shongsaiñ hapoh Dong poh Shnat la seng ïa ka Vigilance Committee ha ka 4.9.1992 bad kane ka Committee ka dang trei ïa la kam haduh mynta.
La seng ïa ka Education Committee ha ka snem 1998 da ka jingthmu ba kane ka Committee kan peit ïa ka jingroi ha ka liang ka pule ka dangle hapoh ka Dong ka Shnat bad kumjuh ruh ban peit ïa ka jingïaid shaphrang ka Lower Primary School jong ka Club.
Ha u snem 2024, katkum ki kyndon treikam jong ka District Council la donkam ban pdiang noh ïa ka SANAD bad ïa ka kyrteng Chutwakhu Social Welfare Local Dorbar, Jowai la pynkylla noh sha ka Dorbar Shnong Chutwakhu, Jowai.
Ïa ki kyntien pdiang sngewbha ha kane ka sngi la ïoh na u Waheh Shnong ma P.W Lyngdoh, ka jingduwai na u Rev. Dr. E.R Tongper, ki jingrwai pdiang na ki khun ka shnong bad la pynphuh pynphieng shuh shuh da ki jingshad pliang bad ka Choreography na ki hep rit jong ka shnong. Katba ïa ki kyntien ai khublei la ïoh na B.G. Ladia bad la pynher ïa ki 100 tylli ki Balloons da Senior Citizen jong ka shnong.
Ka shnong kala sam ruh ïa ki Centenary Jubilee Memonto sha baroh ki longïing hapoh ka shnong, Katba haka por 6 baje janmiet kan don ka Oldies But Goodies Concert bala shim bynta da kynhun Lynx, Theophilus, Desling Amse, Nexus bad Timeless Tunes.

Leave A Reply

Your email address will not be published.