Plie u AT Mondal ïaka Ayush Research Division jong ka IAMC ha USTM, ka jingkyrkhu ïaki samla pule

Nongpoh, Naiwieng 22: Hapdeng ka jingïaid lynti jong ka kynhun ba nyngkong eh jong ki samla pule, kiba dang pule ïaka Bachelor of Ayurvedic Medicine and Surgery (BAMS) ha IA Ayurvedic Medical College kaba dang shu plie shen ha skulbah University of Science and Technology, Khanapara, u AT Mondal Myntri ka tnad Bording bad C&RD ka jylla hynnin ka sngi u la leit ban plie paidbah sa ïaka Ayush Research Division ha katei ka skulbah ban dang bteng ban pynïar ïaka shlem wad jingtip, ban long ruh ka lad bad ka jingkyrkhu kaba khraw ïaki samla pule.
Ha katei ka sngi ka jingplie ïakatei ka Ayush Research Division la don ryngkat ruh da u Mahbubul Hoque Chancellor ka skulbah USTM, Prof. Anil Kumar Sharma Director ka IAMC, ki ophisar, ki doctor ki nonghikai lem bad ki samla pule ha katei ka shlem.
U AT Mondal haba kren ha katei ka sngi u la pynpaw ba kane ka jingioh ban plie ïaka Ayurvedic College bad kumjuh ruh ka tnad wad bñiah ka long shisha ka jingkyrkhu kaba khraw ïaki samla pule ka thaiñ Shatei Lam Mihngi lyngba katei ka skulbah kaba don ha Khanapara bad kane ka long ka lad ïaki samla pule kin dang ioh ban bteng ïaki jingpule ha katei ka skulbah ban lait leit pynlut sha kiwei kiwei ki jylla haka ri India.
U la kyntu ruh ïa kitei ki samla pule kumba kidei ki kynhun ba nyngkong jong katei ka tnad pule ba kin shim ka bynta ban trei shitom namar kane ka juk ka dei ka juk ka jingïaleh bad tang kita kiba tbit bad kiba kynsai bad kiba trei shitom kin longbriew manbriew, namar baroh ka ban sa wan ka shong haka kti ki samla pule kumno ki kwah ban long hadien habud.
Naka liang u Mahbubul Hoque Chancellor ka skulbah USTM u la ai ka jingïaroh ïaka sorkar Meghalaya kaba la ju kyrshan naka por shaka por ïa katei ka shlem pule naduh ba sdang ïaka. U la ong ruh ba watla mynta u snem yn shim tang kumba 60 ngut ki samla pule khmih lynti ba ha ki snem ban wan yn dang lah ban pynïar bad pynheh shuh shuh ïaka jingpdiang ïaki samla pule kiba kwah ban pule ha katei ka lain ban pynlong ruh ïa katei ka skulbah kum kawei naki skul ba kynsai haka pyrthei.
Shuh shuh naka liang u Hoque u la ong ruh ba shuwa u snem 2030 katei ka skulbah USTM kan don lut baroh ki tnad jong ka koit ka khiah naduh ka Allopathy, Unani, Siddha, Homeopathy ryngkat ruh bad ki tnad wad bñiah, u la bynrap.