New Delhi, Risaw, 01: U Myntri Sorkar Pdeng ba dei khmih ïa ka Tnat ki kam ïalehkai, u Anurag Thakur u la plie ïa ka campaign Swachh Bharat 2022 kaba shi bnai ha kylleng ka ri na Prayagraj ha UP mynta ka sngi. U Thakur u la ïashim bynta ha ka jingpynkhuid ïa ka Sangam beach ha Prayagraj bad ki volunteer jong ka Nehru Yuva Kendra, National Service Scheme bad shibun kiwei kiwei ki briew. La pynlong ïa ka jingbam smai ha kane ka jingïalang. U Secretary ka Tnat ki kam ïalehkai, u Sanjay Kumar bad kiwei kiwei ki ophisar jong ka Tnat Sorkar pdeng ki la ïadonlang ha kane ka jingïalang.
Ha ka jingai jingkren ha ka jingïalang, u Thakur u la pyntip ba la pynlong ïa kum kane ka campaign ha u snem ba ladep kaba la tam ïa ka thong jong ka ban lum bad pynkhuid 75 lak ki niut plastic bad kumta mynta u snem ka Tnat ki kam ïalehkai ka la buh ka thong ban lum bad pynkhuid 1 klur kilo ka niut plastic lyngba ka Swachh Bharat 2022.
U Thakur u la bynrap ba kawei na ka ‘Panch Pran’ ba la pynbna da u Myntri Rangbah duh ka ri, u Narendra Modi ha ka jingai jingkren jong u ha ka sngi rakhe ïa ka jingïoh jinglaitluid ka ri mynta u snem kadei ka thong jong ka India kaba la kiew ha ka roi ka par, kumta khlem ka India kaba khuid ngim lah ban pynurlong ïa ka jingangnud ïa ka India kaba la kiew ha ka roi ka par.
U Myntri Sorkar Pdeng u la ong ba ka plastic kam pyut, kaba ïalam sha ki jingpang bad ki jingeh bapher bapher. U la ong ba donkam ban pyllait ïa ka ri na ka jingjaboh ki plastic bad baroh ki hap ban pynurlong ïa ka jingkitkhlieh ban ïada lang ïa ka Mei Mariang. U la bynrap ruh ba lyngba kane yn lah ban pynduna shibun ka jingïoh ïa ki jingpang da kaba pdiang ïa ka jingkhuid kum ka rukom im.
U Thakur u la ong ba la pynlong ïa ka prokram Swachh Bharat 2022 ha 6 lak tylli ki shnong jong 744 tylli ki distrik ha kylleng ka ri lyngba ki kynhun jong ki samla hapoh ka Nehru Yuva Kendra Sangathan (NYKS) bad ki jaka treikam kiba ïasnohkti bad ka National Service Scheme. Kane kam dei tang ka prokram hynrei ka jingpyrshang borbah ban pynsngewthuh ïa ki briew shaphang ka jingkongsan ka jingkhuid jingsuba.
Ki jing thmu jong ka prokram Swachh Bharat 2022 kalong ban pynlong ka jingpynkhuid ha ki jaka paidbah bad ki iing ha baroh ki distrik jong ka ri naduh ka 1-31 tarik Risaw 2022, kynthup baroh ki bynta jong ka imlang sahlang, ki kynhun sorkar, kynthup ki PRI bad ki kynhun shimet, ban wanrah ka jingtip bad ka jingsngew sarong hapdeng ki nongshong shnong ban pynlong ïa ki sawdong sawkun jong ngi kaba khuid bad kaba lait na ka jingjakhlia. Ryngkat bad kane ka campaign yn ai ka mantra jong ka “Swachch Kaal: Amrit Kaal” bad ban pynlong ïa kane ka prokram ka jingïakhih jong ki paidbah lyngba ka Jan Bhagidari.
