Plie pyrda u PM Modi ïa ka Homi Bhabha Cancer Hospital & Research Centre ba T 660 klur ha Mohali
New Delhi, Nailar: U Myntri Rangbahduh jong ka Ri India u Narendra Modi hynne ka sngi u la plie pyrda ïa ka “Homi Bhabha Cancer Hospital & Research Centre” ha nongbah Mohali ha Punjab. Ïa kane ka Hospital la tei ha ka jinglut palat T 660 klur da ka Tata Memorial Centre, kynthup ïa ka jaka pule hapoh ka Department of Atomic Energy jong ka sorkar India.
Kane ka hospital ka don 300 jingthiah bad kaba la biang ki kor ki bor ka juk sumar ba mynta bad kiwei ki jingdonkam jong baroh ki jait jingpang bampong kynthup kum ka Surgery, Radiotherapy bad Medical Oncology – Chemotherapy, Immunotherapy bad Bone Narrow Transplant. “Ban pynlong ïa ka India ri kaba kiew shaprang, ka longkaba donkam ban kyntiew bad pynkhlaiñ ïa ki jingshakri kaba ka khambha ha ka koit ka khiah,” ong u PM Modi hadien ka jingplie ïa kane ka hopsital.
“Haba ki briew ka India kiba pang ba shitom kin ioh ka jingsumar kaba thymmai, kin ïoh kloi ka jingkoit jingkhiah, ka jingkhiah krad ki briew (nongshong shnong) ka dei ka jingkhiah krad jong ka Ri,” la bynrap shuh shuh u PM Modi.
U PM Modi u la ong, “Ha shwuwa 2014, ki don kumba 400 tylli baroh ki medical colleges haka ri baroh kawei, Ha kine ki 8 snem ka kha thymmai palat 200 tylli ki medical colleges kibala tei ha kylleng jong ka Ri.” Ha katei ka sngi la don ryngkat lang bad ai jingkren ruh u Myntri Rangbah ka jylla Punjab u Bhagwant Mann.
Dang sheh shi sngi shuwa kane, u PM Modi u la dep lie ruh ïa ka Amrita Hospital ha Faridabad ha Haryana. La khmih da ka Mata Amritanandamayi Math, kaba long kawei na ki jaka sumar ka juk mynta kaba don 2,600 jingthiah. Ka jingtei ïa kane ka hospital ka kot kumba T 6,000 klur bad yn pynïoh ïa baroh ki lad ai jingsumar na bynta ka jingkoit ka khiah ki briew ka Faridabad, ka thaiñ NCR bad ka ri baroh kawei.