Plie pyrda u bah Renikton ïa ka MFCS 2022 – 2023 ha Madan Saitsnad

Mawkyrwat, Nohprah 21 : Ka Mawlangwir Sports Club mynta ka sngi, ka 17 tarik u Nohprah, 2022, ka la ïoh ban plie pyrda ïa ka Mawlangwir Football Community Shield (MFCS), 2022 – ‘23, ha Madan Saitsnad, Mawlangwir, South West Khasi Hills District ha kaba la plie ïa ka da u bah Renikton Lyngdoh Tongkhar, Minister ka tnad Umbam Umdih jong ka Sorkar Meghalaya bad MLA ka Mawkyrwat Constituency.
Ha kane ka sngi plie ïa katei ka lympung, ka jingïalehkai ka la long hapdeng ka Se-La-Jong FC pyrshah ïa ka Seven United SS&CC. Ka jingïalehkai hapdeng kine ki ar kynhun ka la long kaba shongshit bha ha kaba baroh ar ki la ïa khun shitom ban pynkhih jar jar hynrei khlem da ïoh lad ban leh kumta ha ka kylla step. Hynrei ynda la poi ha ka kylla miet, ha ka minit kaba 83, ka Se-La-Jong FC ka la ïoh ban pynkhih ïa ka jar lyngba ka kol jong u Denzil Kharshandi.
Ka Seven United SS&CC ka la ïa khun shitom ban ïoh ban pynphai hynrei kam shym la lah shuh bad ka jingïalehkai ka la kut ha ka jingjop jong ka Se-La-Jong FC da 1 – 0 kol.
Haba kren lyngkot ha ka jingïalang, u Renikton Lyngdoh Tongkhar, Minister ka tnad Umbam Umdih jong ka Sorkar Meghalaya bad MLA ka Mawkyrwat Constituency u la pynpaw ka jingaikhublei ïa ka Mawlangwir Sports Club kaba la pynlong biang sa shisien ïa kane ka lympung ïalehkai kynjatbol kaba long kawei na ki lad ban sei madan biang ïa ki samla jong ka South West Khasi Hills District bad kumjuh ruh ïa kiwei de kiba nabar ka distrik ba kin pyni ïa la ki sap ki phong ba ki ki don. Namarkata, u la ong kum ki ‘rangïalehkai kim dei ban pynleh ei ïa kata ka bynta hynrei ki dei ban long kiba trei shitom bad minot thop ha kane ka kam khnang ba kan long ka jingmyntoi ha ki sngi ki ban sa wan.
Haba kren ai mynsiem na ka bynta ki ar tylli ki kynhun ki ban sa mih ha madan ban ïa khun kum ka jingplie pyrda ïa kane ka lympung u la kyntu ba ki dei ban ïalehkai bha bad ïaleh da ka mynsiem jong ka jingthmu ban pynpoi ïa la ka kynhun sha ka thong jong ka jingjop.
Ha kajuh ka por u la khot la wer ruh ïa ki paidbah na kylleng ki shnong ba kin wan ban sakhi ïa kane ka lympung ïalehkai khnang ba kan long ka jingkyrshan na ka bynta ka sports club bad kumjuh ruh ka jingaimynsiem ka bynta baroh ki nongwan ïashimbynta.
Ha kane ka sngi la ïoh ruh ban pynlong ka jingïalang ba lyngkot ha kaba u bah S.K. Budnah, President jong ka Mawlangwir Sports Club bud ka jingkren lyngkot na u bah N.S. Wanniang, Myntri jong ka Shnong Mawlangwir.
Ka jingïalehkai ba ar jong kane ka lympung pat kan long ha ka 21 tarik u Nohprah, 2022, hapdeng ka Azriel Sports Club, Shillong, bad ka Mawkohphet Sports Club, Mawkyrwat.