Mawkyrwat, Risaw 04: Kum shibynta ban kyntiew ïa ka jingïalehkai basketball ha ki khynnah skul kiba hapoh jong ka South West Khasi Hills District na ka liang ka Basketball Hounds Club Mawkyrwat (BHCM) mynta ka sngi ka la pynlong ïa ka 1st Inter School Basketball Tournament 2023 ha madan Basketball Court jong ka Nativity Higher Secondary School, Mawkyrwat.
Ha kane ka lympyng ïalehkai ki don baroh phra tylli ki kynhun kata 5 tylli na ki shynrang bad 3 tylli na ki Kynthei bad ïa kane la wan ban plie pyrda da u bah Ardent Miller Basaïawmoit u MLA jong ka Voice of the People Party (VPP) na ka Nongkrem Constituency ryngkat ka jingïadonlang u bah Freddy Marweiñ, President bad u Wanskhemlang Lyngkhoi, Secretary jong ka Basket Hounds Club Mawkyrwat lem ruh ki riew rangbah jong ka thaiñ.
Ha kane ka sngi ki kynhun kiba la ïalehkai ki long ka St. Mary’s Higher Secondary School, Rangblang kaba la jop da 22 – 0 basket pyrshah ïa ka Nativity Higher Secondary School, Mawkyrwat kaba dei jong ki kynthei. Katba ha ka jingïalehkai jong ki shynrang pat ka JNV, Mawkyrwat ka la jop da 14 – 12 basket ïa ka Little Star Higher Secondary School, Mawkyrwat, ka Jingïaseng Kynthei Mawkyrwat Presbytery Higher Secondary School, Mawkyrwat ka la pynliem noh da 19 – 14 basket ïa ka JNV, Mawkyrwat.
Nangta, ka Nativity Higher Secondary School, Mawkyrwat da 13 – 11 basket ïa ka St. Mary’s Higher Secondary School, Rangblang, ka St. Mary’s Higher Secondary School, Rangblang ka la shah rem noh da 52 – 17 basket ha ka Jingïaseng Kynthei Mawkyrwat Presbytery Higher Secondary School, Mawkyrwat bad kaba khadduh ka Nativity Higher Secondary School, Mawkyrwat ka la jop da 14 – 06 basket ïa ka Little Star Higher Secondary School, Mawkyrwat.
Ha ka jingïalang ba lyngkot, u bah Ardent Miller Basaïawmoit u MLA jong ka Voice of the People Party (VPP) na ka Nongkrem Constituency ha ka jingkren jong ula ai ai mynsiem ïa ki khynnah skul ba kim dei ban pynleh noh ïa ka por jong ki ha kiei kiei ki bym ler kam hynrei nalor ka jingpule ki dei ruh ban don ka por ban ïalehkai. “Ka por kaba kham bun kum ki khynnah skul ka dei ban pynlut ka long ban pynleit jingmut ha ki kot ki sla namar ka jingnang jingstad ka long kaba donkam”, u la ong.
Haba kren ai mynsiem ha ka jingïalehkai u la ong ba ha ka jingïaleh hi kin don beit kiba rem bad kiba jop, namarkata, kiba jop kin nang ïai ïakhun ban pynpoi kham shakhmat shuh shuh bad kiba rem ruh kim dei ban noh mynsiem namar ka jingshah rem hynrei ki dei ban nang ïai pyrshang ban kut jingmut ne ban trei shitom.
Ïa ka jingïalang ba la pynïaid da u bah K. Lyngdoh bad ka jingkhublei na ka kong K. Thyrniang.
