Nongpoh, Risaw 04 : Ban dang kyntiew ïa ki sap ki phong kin khun samla ha ka kam ïalehkai phutbol bad ban sei madan ïa ki sap ki phong jongki, Ka Nongpoh Sports Association mynta ka sngi ka la plie pyrda noh ïa ka lympung ïalehkai phutbol ba la ai kyrteng ‘Invitation Knockout Football Tournament 2022’ ba la pynlong ha madan NSCA Mini-Stadium, Pahamsyiem.
Ïa kane ka tournament la wan ban plie pyrda da u District Sports Officer ka Ri Bhoi, u Bah Bobby Nongbet kum u kongsan bad u President ka Ri Bhoi Youth Federation, u Bah Bipul Thangkhiew kum u symbut kongsan.
La sakhi lang ruh ha kane ka sngi da ka jingdon lang u President ka Nongpoh Sports Association, u Bah Lambok Rymbai, u Ramgbah Shnong ka Pahamsyiem, u Bah Gedwin Lyngdoh, u President ka HNYF, Northern Region, U Bah Marcus Marten bad kynthup kiwei kiwei ki riew rangbah.
Na ka liang ka Nongpoh Sports Asso-ciation ka la pynkhreh ruh ïa ki khusnam ha kaba ka lahduh kan ïoh khur ïa ka song pisa kaba T. 1 lakh bad kaba wan baar kan ïoh khur ïa ka song pisa kaba T. 50,000 lem bad ki Trophy. Ki don haduh 16 tylli ki kynhun ïalehkai na kylleng ka Ri Khasi-Jaintia kiba la wan ban shim bynta ha kane ka tournament.
Ha ka jingplie pyrda ïa kane ka tournament la ïa aireng hapdeng ka Ri Bhoi United pyrshah ïa ka Umden Sports Association.
Haba phai sha ka jingïakhun kine ki ar kynhun, ha ka kylla step baroh ar kynhun ki la trei shitom daka jingtmu ban ïoh rah ïa ka jingjop bad khlem da don ba lah ban thep kol bad kumjuh ruh ha ka kylla miet ruh ka jingïakhun ka la kut ha ka jingïakhaid bad dei lyngba ka tie breaker ba ka Ri Bhoi United ka la ïoh rah noh ïa ka nam jop da kaba ka la pynliem noh ïa ka Umden Sports Association da 6-5 kol.
