Mawkyrwat, Nailar 26 : Ka Nonglang Sports Club (NSC) kum shi bynta ban pynkhraw ïa ka jingpynkhreh ïa ka jingdap 50 snem ha u snem 2023 jong ka jingïaid lynti ha ka kam shakri kum ka club ha ka imlang sahlang lyngba ki jingïalehkai bad kiwei kiwei ki kam ne ki bynta mynta ka sngi 26-08-2022 ka la plie pyrda ïa ka Nonglang Super League 2022 ha madan Pyndeniewlyngdoh, Nonglang, South West Khasi Hills District.
Ki kynhun kiba la ïa shimbynta ha kane ka league ki don kumba 6 tylli (ka Janai FC, ka Maitshaphrang FC, Rangkynsai FC, ka Lai Ngut Chi Dus, ka La i jong FC bad ka Albediego FC).
Ha kane ka sngi plie ki kynhun kiba la ïalehkai ki long hapdeng ka Maitshaphrang FC pyrshah iaka Lai Ngut Chi Dus. Ka Lai Ngut Chi Dus ka la ïoh ban thep kol lyngba u George Franky Snaitang ha ka minit ba 70 bad tad haduh kaba kut ka Lai Ngut Chi Dus ka la jop ïa ka Maitshaphrang FC da 1 – 0 kol . Ka jingïalehkai ka la long shisha kaba ïa biang bor bha bad baroh ar kynhun ki la ïalehkai bha.
Ha kane ka sngi plie la wan ban plie da u samla Benjohnson Lyngdoh, uba dei uwei ki samla ba trei shit rhem bha ha ka imlang sahlang. Ka jingïahlehkai kaba bud kan long ha ka 02-09-2022 hapdeng ka Janai FC pyrshah ïa ka Albediego FC ha ka por 3 nohphai sngi ha madan Pyndeniewlyngdoh, Nonglang, South West Khasi Hills District.
