Plie pyrda ka DC South West Khas Hills ïa ka ïing sah ki khunswet shynrang ha shnong Sohkhyllam

Mawkyrwat, ‘Nailar, 21: Ka Deputy Commissioner, South West Khasi Hills District, kong C. Kharkongngor, IAS, ha ka sngi saitjaiñ jong ka taïew ka la ïoh ban plie pyrda ïa ka ïing sah ki khunswet ne ka Hope Children’s Home kaba dei jong ki khynnah shynrang ha Shnong Sohkhyllam, South West Khasi Hills District ha ryngkat ka jingïadonlang u bah Renikton Lyngdoh Tongkhar, President jong ka Hope Children’s Home (HCH) bad u Nongmihkhmat jong ka Mawkyrwat Constituency uba bat ruh ïa ka shuki Myntri ka sorkar jylla Meghalaya.
Ïa kane ka jingtei la noh synñiang pisa da ka Khasi Jaiñtia Welfare Association (KJWA) lyngba ka Research Cell ha ka jingmang kaba T. 5 lak shiteng bad ka jingplie ïa kane ka ïing sah jong ki khunswet ne ka ‘Boys’ Residential Building jong ka Hope Children Home’, Mawkyrwat, South West Khasi Hills District ka dei ruh kum shibynta jong ka jingplie pyrda ïa ka jingrakhe dap 10 snem jong ka Research Cell – Khasi Jaiñtia Welfare Association (KJWA) kata naduh ba la sdang ïa ka ha u snem 2013 – 2023.
Haba kren ha ka jingïalang, na ka liang ka Deputy Commissioner, South West Khasi Hills District, kong C. Kharkongngor, IAS ka la ong ba lyngba ka jingplie ïa kum kine ki jaka sah jong ki khunswet khunrangli ki bym don shuh ki nongri nongsumar ne lah ban ong ba kim don shuh kiba lah ban bsa kan sa long ka jingïarap na ka bynta jong ki ba kin im ka jingim kaba bha namar lyngba ka jingdon jong ki ha kine ki jaka sah kin sa ïoh shibun ki lad jinghikai bad khamtam ba kin ïoh ban leit sha ki skul pule.
Ka la pynkynmaw ruh ba kum ki khun haba ki don ha kum kine ki jaka sah, ki don la ki jong ki jong ki kam ba kin hap ban pyndep ïa ki kam ba la pynshet bad lada kim pyndep ha ka por kaba biang kin sa shah mai ne shah sneng lyngba kiba bun ki jingai jinghikai ba kim dei ban long jaituh ne leh bym suid ñiew ha kiei kiei namar lyngba ka jinglong smat jong ki naduh dang rit kan ai ka jinghikai ba ynda ki la heh la san ruh kin pynmlien ïa kane ka bynta ba ki ki la ïoh jinghikai.
Namarkata, ka la ai mynsiem na ka bynta ki khunswet kiba sah ha kine ki jaka ba la shna kyrpang ba kim dei ban sngewlong nongwei, hynrei ki dei ban im beit ka jingim kaba bha ryngkat ka jingburom na ka bynta ki nongpynïaid bad leh donakor ha kiei kiei khamtam ba ki dei ban don ka mynsiem jong ka jingïakhun ban pynpoi sha ka thong jong ka jingjop ha ki jingïaleh. “Ka jingphohsniew, ka jingkyrmen bad ka jinglong ryntih ha kiei kiei ka long kaba donkam haduh katta katta”, ong ka Deputy Commissioner namar ka lawei ba phyrnai ka ap na ka bynta jong ki iwei pa iwei ki khun hep kiba rit.
Ka la pynshai ruh ba lyngba ka jingdon jong kane ka Hope Orphanage Trust ka la dei lypa kawei na ki kam ba kin shakri ïa U Blei namar kumba ong, “ka jingshakri ïa ki para briew ka long ruh ka jingshakri ïa U Blei”. Kumta ka don ka jingkyrmen ba lyngba ka jingïoh ban plie ïa kane ka jingtei mynta ka sngi kan sa lah ban pyntyllun ïa shibun bah ki kam ha ka imlang ka sahlang bad ban ai ka jingshakri na ka bynta ki para briew kiba donkam ka jingïarap. Ha kajuh ka por ka la ai mynsiem ruh ïa ki nongpynïaid ba kin nang ïai trei shitom bad aiti lut ha kane ka kam khnang ba ki jingthmu kiba bun kin long kiba ïaid beit ïaid ryntih.
Ha ka jingkren jong u bah G. Reenbohn uba dei u President ka Khasi Jaiñtia Welfare Association (KJWA), Shillong, u la pynkynmaw ba ïa ka Khasi Jaiñtia Welfare Association (KJWA) la sdang naduh ka 20 tarik jong u bnai ‘Nailar, 1977 ha ka skul jong ka KJP Higher Secondary School kaba don ha Mission, Shillong lyngba ki ‘riew rangbah kum u Pastor T. Reenbohn, u Phadar Sngi, u Pa’iem Olensing Syiem bad kiwei de ha kaba kane ka KJWA ka la dap mynta 45 snem.
U Professor S.S. Majaw, Chairman Research Cell KJWA ha ka jingkren jong u u la ïathuh ïa ki katto katne ki kam bad ki jingtrei jong ka Research Cell – Khasi Jaiñtia Welfare Association (KJWA) ba la sdang ïa ka ha u snem 2013 kata da kaba ki la sdang nyngkong da ka kam ri ngap ha ka shnong Nongwar kaba don ha ki thaiñ Shella bad halor kane la dep ruh ban pynmih ïa kawei ka kot kaba dei shaphang ka kam ri ngap, ban pynkhie im ïa ka rwai ka siaw bad ka put ka tem jong u khasi ne ki jingrwai phawar khasi kiba long ka nongmei nongpar jong ki kpa tymmen ka mynnor bad haduh kane ka pateng kaba mynta.
Nangta, ka la ïoh ruh ban pynlong ki jingïakop thoh esse, thoh kramar, thoh shithi bad thoh ïa ki khana pateng ne parom da ka ktien khasi na ka bynta ki khynnah bad ki samla pule, ka la ïoh ruh ban pynlong ïa ki kynja workshop na ka bynta ki nonghikai jong ki Lower bad Upper Primary ha ki ar tylli ki jaka kawei ha Umthli bad ha Ummulong. Nalor kitei ki kam, u Professor S.S. Majaw u la ong ba ka Cell ka dang ïai pyntyllun ïa ki kam jong ka ban pynmih ïa ki kramar ha ka ktien khasi ha kaba na ka bynta kine ki kot la dep ban thoh khnang ba ki khynnah pule kin ïoh ban pyndonkam ha ki skul jong ki.
Kiwei pat kiba ïadonlang ha kane ka sngi bad kiba la ai jingkren ki long u bah Renikton Lyngdoh Tongkhar, u President jong ka Hope Children’s Home (HCH) bad u Nongmihkhmat jong ka Mawkyrwat Constituency uba bat ruh ïa ka shuki Myntri ka sorkar jylla Meghalaya u bah P. Wanniang, Myntri Shnong jong ka Sohkhyllam bad u Dr. Airpeace W. Rani, Convener jong ka Tin Jubilee uba long u nongpynïaid, u bah Bording Lyngdoh, Founder jong ka Hope Children’s Home uba la ai ka jingkren khublei bad jingdwai pynkyntang ïa ïing sah jong ki khunswet ne ka ‘Boys’ Residential Building jong ka Hope Children Home’ da u Tymmen Basan bah B. Lyngdoh.