Shillong, Nailar 12 : Ka Christ Church Morning School, Mawlai Syllaikariah ha ka sngi Palei ka 11 tarik u Nailar ka la plie pyrda ïa ka Inter School Football Tournament kum shi bynta jong ka jingrakhe ïa ka jingdap 25 snem jong ka skul.
Haba phai sha ka jingïakhun ba la ïalehkai ha Madanheh mini stadium, Mawlai Phudmuri ka Mawlai Presbyterian HSS, Ïewrynghep ka la lah ban pynliem ïa ka Mount Carmel SS, Mawlai Nongkwar da 2-1 kol.
Ha ka jingïakhun kaba ar ruh ka jingjop ka la long kumjuh, ïa kaba ka Jaïaw Prebyterian SS ka la pynliem ïa ka Christ Church Morning School da 2-1 kol. Ha kane ka lympung ïakhun ki don baroh 11 tylli ki skul kiba la wan ban ïa shim bynta.
Hashwa ban sdang ïa ka jingïalehkai ka la don ka jingïalang ba lyngkot ha ka jingdon ryngkat u Bah Alexander Syiem, u President ka School managing committee, uba la ai ruh ïa ka jingkren bad la ïoh ruh ïa ka jingdwai na u Bah Khatarbor Rapsang, u shakri jong U Trai na ka Balang U Khrist, Mawlai Nonglum. Ha kane ka sngi la don lang ruh u headmaster bad ki nonghikai jong ka skul.
