Mumbai, Jylliew 17 : La plie paidbah ïa ka ïew phlim documentary kaba nyngkong duh ha ka 18th Mumbai International Film Festival (MIFF) hynin ka sngi. Kane ka sienjam ka long kum u mawmer na ka bynta ka MIFF, kaba pynkhlaiñ ïa ka kyrdan jong ka kum ka rynsan kaba halor tam na ka bynta ki phlim non-feature ha ka thaiñ South Asia. Ka ïew phlim documentary, ka sienjam kaba prat lynti, ka thmu ban kyntiew ïa ki kam shna phlim documentary da kaba ai ka rynsan kaba kyrpang ïa ki nongshna phlim ba kin ïadei bad ki nongthied.
Kane ka prokram, kaba long naduh ka 16 haduh 18 tarik u Jylliew 2024 ha ka NFDC complex ka la khring jan 200 tylli ki projek na 10 tylli ki ri kiba mihkhmat ïa 27 tylli ki jait ktien.
Ka nongshna phlim Apoorva Bakshi ka la plie paidbah ïa ka ïew phlim documentary ha ka jingïadonlang u Prithul Kumar, Festival Director, MIFF bad Managing Director, NFDC bad ka Smita Vats Sharma, ADG PIB (West Zone) bad CEO, CBFC. Ha ka jingai jingkren ïa kito kiba kwah ban long nongshna phlim, ka Apoorva Bakshi ka la kyntu ïa kiba kin pyndonkam ïa ki lad kiba don ha kane ka ïew na ka bynta ki jingïadei ba seisoh. “To ngin ïakynduh, ïakren bad peit ïa ki jingmut ba thymmai, ki lad bad jingïatreilang haba ngi don hangne,” ka la ong.
Kane ka ïew kan don ïa ki bynta bapher bapher, kane ka don 16 tylli ki projek bad ka pynïasoh ïa ki nongshna phlim bad kito kiba lah ban ïatreilang, ki nongpynmih phlim, ki nongpynmih phlim lang, bad ki nongbei tyngka na kylleng ka pyrthei.
Ka Work-in-Progress (WIP) Lab, kane ka pyni ïa 6 tylli ki projek kiba dang ïaid shakhmat bad ka plie lad ban ïoh ïa ki jingsngew bad ki jingïalam lynti da kaba la tbit ha ka kam khnang ban pynbha shuh shuh ïa kine ki phlim.
Ha kaba ïadei bad ka Viewing Room, la ong ba kane ka dei ka jaka ba kyrpang ba pyni 106 tylli ki phlim ba la pyndep, ki phlim lyngkot, ki phlim animation ïa ki delegate kaba plie lad ïa ki jingïakut ban pynïaid ïew bad ruh ka jingpynbiang pisa na ka bynta kine ki phlim.
Ha ryngkat kine, kane ka ïew kan don ïa ka ‘Open Buyer-Seller Meet’, kaba plie lad ïa ki jingïatreilang ha ka jingpynmih, jingpynïasoh, jingdie, jingpynïaid ïew ïa kine ki phlim. Yn don ruh ka bynta kaba kyrpang ka ban peit ïa ka jingïadei hapdeng ka jingshna phlim documentary bad ki kompeni.
Ki nongïalam ha kane ka kam kum ka FICCI kan ïamir jingmut halor ka jingpynbiang pisa ki kompeni kum ka atiar na ka bynta ka jingkyntiew ïa ki brand bad ka jingwanrah ïa ka bha ka miat ha ka imlang sahlang.
Kane ka ïew phlim documentary ka thmu ban long ka jaka pdeng na ka bynta ki jingïadei kaba plie lad hapdeng kito kiba la tbit ha ka kam bad kito kiba dang sdang paw ha ka kam.
Da kaba pynbiang ïa ka jingkyrshan ha ki bynta bapher bapher jong ka jingpynmih ïa kine ki phlim, ka thmu ban kyntiew ïa ka jingpynïaid bad ka jingïarap ki phlim documentary ha kylleng ka pyrthei. Kane ka ïew phlim documentary ka ïeng skhem ban pynsawa ïa ka sur jong ki nongshna phlim bad ban wanrah shakhmat ïa ki khana ha ki kam cinema jong ka pyrthei.
Kito kiba ïashim bynta kin ïoh jingnang jingstad shaphang ki jinglong jingman ba mynta, ki jingdawa ha ki ïew, ki rukom pynïaid bad ki jingthrang jong ki nongpeit, ha kaba kito kiba la tbit ha ka kam ki ai jingmut ban ïarap ïa kine ki projek ba kin poi sha ka thong. Kane ka ïew phlim documentary ka don shibun ki stall jong ki kynhun bapher bapher kum ka Maharashtra Film, Stage and Cultural Development Cooperation Ltd., J&K, IDPA, Cinedubs bad kiwei kiwei. Ka tnat Kam Jngoh Kai jong ka Sorkar Pdeng ka la plie lad ruh ïa ki stall na ki ri bapher bapher kum ka Sri Lanka, Belarus, Iran bad Argentina.
