Nongstoiñ, Nailar 11: Ka WKSU sengkmie ka la leit ban ïakynduh bad ai jingthoh sha u mission Director ka NHM halor ka jingpynsahteng ban plie noh ïa ki ar tylli ki jaka ai jingsumar, kita ki long ka Urban Health and Wellness Centre kawei ha Mawkhlam Nongpyndeng bad kawei ha Pyndengrei Nongstoiñ.
Ha ka jingshisha ha ka 22 tarik u bnai Nailar 2023, ïa kitei ki centre la dei ban plie noh bad wat ïa ki program ruh la dep pynbeit da ka tnad ka koit ka khiah. Naduh ki maw nongrim ruh la dep ban thoh bad pyndait.
Hynrei sngew lyngngoh ha kaba ïa dei bad ka jingbuhteng noh na ka liang ka NHM ban pynurlong ha katei ka por ba la dep pynkhreh nadong shadong da ka tnad ka koit ka khiah kaba don ha Nongstoiñ.
Ka seng ha kaba ïa dei bad kane ka kyrpad ia u Mission Director jong ka NHM ban plie noh mardor ïa kitei ki ar tylli ki shlem ai jingsumar ïa u paidbah jong ka thain. Lada ka sorkar bad katei ka tnad ka dang buhteng ban plie noh, na ka liang ka seng kam banse ban jied da ki sienjam kiba kham tyngeh, ong u samla D.Sun president jong ka WKSU.
