Plie maw nongrim u bah Lahkmen Rymbui na ka bynta ban tei ïa ka surok bad ki jingkieng

Khliehriat nailar 30: U myntri ki kam poh iïng jong ka sorkar jylla, u bah Lahkmen Rymbui, mynta ka sngi u la plie ïa u maw nongrim ha ka thaiñ War Jaiñtia kaba don ha West Jaiñtia Hills District kaba na ka bynta ban tei ïa ka surok kaba don 5.14 Km bad kaba kynthup ruh ïa ki ar tyllii ki jingkieng kaba na ka shnong Kudengrim sha Kudengthymmai, ka shnong kaba don ha War Jaiñtia.
Ka mang tyngka na ka bynta ban shna ïa kane ka surok ka dei kaba wan lyngba ka New Development Bank, kaba ha ka mang tyngka kaba T.17.6375 klur tyngka. Ïa kane ka prokram plie maw nongrim la khot pynlong da ka ophis jong u Chief Engineer (Standard), PWD (Roads) ha ryngkat ka jingïatreilang bad tnat Tourism jong ka jylla Meghalaya.
Ha ka jingïalang la ïadon ryngkat lang ruh u Chief Engineer (Standard), PWD (Roads), u B.P. Marak, u Director jong ka tnat tourism Department, u bah Cyril V. Darlong Diengdoh IAS,u Waheh Shnong Kudengrim bad Kudengthymmai, ki nongtrei ka tnat PWD, Jowai lem bad ki nongshnong shnong.
Haba kren ha ka jingïalang, U Myntri ka sorkar jylla, u bah Lahkmen Rymbui u la ong ba kane ka jingiohlad ban shna ïa ka surok bad ki jingkieng ka dei lyngba ka jingtrei lang ki Dorbar Shnong bad ki ophisar ryngkat bad ka sorkar, u la ong ruh ba kane ka jinglah ban pynurlong ïa kane ka sngi kumba long mynta kap long ka sngi ka ban sah jingkynmaw ïa ki shnong jong ka thaiñ hi baroh kawei “Ban ioh ïa kane ka surok bad ki jingkieng kam long kaba suk ha kaba naduh u snem 2019 ngi la wad ki lad ki lynti na kylleng bad ha kaba khaduh ngi la ïoh ïa ka mang tyngka na ka bynta kane ka surok, lyngba kane ka surok kan kham pynjan ïa ki nongshong shnong jong ka thaiñ ban poi sha ka ïew Dawki,kaba dei ka ïew khappud, kumjuh ruh ban poi sha Nongtalang CHC, sha Nongtalang College bad sha duh sha sor Shillong” ong u bah lahkmen Rymbui.
U Director jong ka tnat Tourism, u bah Lyngdoh, u la ong ba kane ka thaiñ bad ka shnong Kudeng, ha ka thain War Jaiñtia ka don shi bun ki jaka kiba itynnand, kiba lah ban khring ïa ki nongwan jngohkai pyrthei na kylleng ki jaka ha kaba ha kane ka thaiñ ki don ki jingkieng jri, ki kshaid, ka jaka ba pynneh pynsah ïa ki dohkha bad ki doh um (Fish sanctuary), ki jaka ïaid kjat kum ki tracking spot bad kiwei, kumta kane ka surok bad ki jingkieng kiba yn sa shna kan pynsuk ïa ki nong wan jngohkai ban wan sha kane ka jaka bad sa kawei ruh kaba kham kongsan shuh shuh ka long ba lyngba kane ka surok kan wanrah shi bun ki jingmyntoi ïa ki nongshong shnong ban kyntiew ïa ka ïoh ka kot bad ka khaiï ka pateng ka jong ki.
La pynphuh pynphieng shuh shuh ïa kane ka prokram da ki jingrwai, ki jingshad jong ki khynnah skul kumjuh ruh ka jingshad tynrai kaba la tip kum ka shnad Rong Khusi.