Plie lad ka APEDA ïa ka jingshalan Soh ñiamtra ba la ïoh jingithuh GI tag sha Dubai

Shillong, Nohprah, 03: Kum shi bynta ki jingpyrshang ban kyntiew ïa ki mar rep ba la ïoh jingithuh Geographical Indications (GI) tag, ka tnat Commerce and Industry lyngba ka kynhun jong ka kaba kyntiew ïa ka jingshalan ïa ki mar rep shabar ri, ka Agricultural and Processed Food Products Export Development Authority (APEDA) ka la pyrshang ban lap ïa ki mar thymmai bad ki jaka shalan mar thymmai.
Kum shi bynta jong kane ka kam, ka APEDA ka la plié lad ïa ka jingpynkit ïa ki Soh ñiamtra jong ka Meghalaya kiba la ïoh jingithuh GI tag sha Dubai ha ka jingïatreilang bad ka tnat Agriculture & Farmers Welfare jong ka Sorkar Meghalaya. Kane ka jingpyrshang pynkit ïa kine ki mar ka la sdang lyngba kane ka jingpynkit haduh shi ton kine ki soh.
Kine ki Soh ñiamtra ba la pynkit ki dei kiba la ïoh na ka FPC (farmer producer company) kaba don ha Jirang hapoh Ri Bhoi distrik jong ka jylla Meghalaya. Ki Soh ñiamtra nangne kiba tip kum ki Khasi Mandarin ki dei kiba thung hapoh ka Mission Organic Value Chain Development for North Eastern Region (MOVCDNER), kaba dei ka mission hapoh ka National Mission for Sustainable Agriculture (NMSA).
Ïa kane ka jingpynkit ïa kine ki soh la pyllait da u S Sadhu, Agriculture Secretary ka Sorkar Meghalaya katba u Chairman ka APEDA u la ai jingkren ha ka jingïalang lyngba ki lad digital.
Ha kane ka sngi, u Chairman ka APEDA, u Angamuthu u la ban jur ha ka jingpynkylla ïa ka thaiñ Shatei Lammihngi sha ka jaka Pdeng jong ki mar rep Organic. Kane ka dei ka por kaba biang bha ban kyntiew ïa ka rukom rep Organic ha Meghalaya sha kylleng ka ri bad ruh shabar ri. Kumta, to ngin ïatrei lang ban kyntiew ïa ka horticulture, ki mar rep organic bad kiwei kiwei ki mar na Meghalaya.”
Lyngba ki sienjam ka APEDA, ka la don ka jingkiew ha ka jingshalan ïa ki mar rep na ki jylla ka thaiñ Shatei Lammihngi kum ka Meghalaya, Sikkim, Assam, Nagaland, Manipur, Mizoram, Tripura bad Arunachal Pradesh.
Namar ki sienjam ka APEDA, ka thaiñ Shatei Lammihngi ka la ïohi ïa ka jingkiew haduh 85.34% ha ka jingshalan ïa ki mar rep ha kine ki hynriew snem ba la dep bad kane ka la kiew na ka USD 2.52 million ha u 2016-17 sha ka USD 17.2 million ha u 2021-22. Ki jaka ba pynpoi mar bha ki dei ka Bangladesh, Bhutan, ka Middle East, ka UK bad Europe.
Ban wanrah ïa ki jingïasoh bad ki iew, ka APEDA ka la pynlong ïa ki field visit jong ki nongthied mar ba kin ïoh jingtip hi dalade shaphang ki rukom rep jong ki nongrep lyngba ka jingkhot sngewbha ïa kine ki nongthied mar na ki ri bapher bapher kum ka Middle East, ki ri ha ka thain mihngi, ki ri hapoh Europe bad Australia bad kiwei kiwei. Ïa kine ki field visit la pynlong ha baroh ki phra tylli ki jylla ka thaiñ Shatei Lammihngi.
Ka APEDA, ha ka jingïatreilang bad ka tnat Commerce and Industry jong ka Sorkar Assam, ka la pynlong ïa ka conference ban kyntiew ïa ki jingshalan mar kaba long ruh ka jingïakynduh hapdeng ki nongdie bad ki nongthied ha Aizawl, Mizoram ha u bnai Lber 2021.
Ha ryngkat kine, ka APEDA ka la pynlong ïa ka jingïalang international buyer seller meet (BSM) ha Guwahati, Assam ha ka 10 tarik u Lber, 2022 ha kaba ki briew na kylleng ka jylla ki la pyni ïa ki mar rep ba bun, kiba kynthup ïa ki mar kiba la ïoh jingithuh GI tag kum ki soh, ki jhur, ki mar bam ba la dep shna, u khaw iong, khaw saw, ki musli musla, sla sha, coffee, ngap, ki doh ba la pynkhreh, bad kiwei kiwei ki mar bam organic. Ki nongthied na Sri Lanka, Dubai, Bangladesh, Oman, Netherlands, Singapore bad Greece ki la ïashim bynta lang bad ki nongdie na ka thaiñ Shatei Lammihngi bad kiwei kiwei ki jylla.
Ka APEDA ka la pynlong ïa ka BSM jong baroh kawei ka ri ha Guwahati ha ka 24 tarik u Jylliew, 2022 ban kyntiew ïa ka jingshalan ïa ki mar organic kiba rep ha Assam. Ka APEDA ka la soi ruh ïa ka MoU bad ka Assam Agriculture University, Jorhat ban pynlong ïa ki jingai jinghikai shaphang ki por shuwa ban bet symbai bad ka por hadien ba la rep ïa ki mar rep bad ruh kiwei kiwei ki kam wad bniah na ka bynta ka jingkyntiew ïa ka jingshalan ïa ki mar na ka thain.
Ki mar ba la ïoh jingithuh GI tag na ka thaiñ Shatei Lammihngi ba ka APEDA ka kyntiew ki dei u Sohmynken Beb, Soh Jew na Assam bad kine ki dei kiba u Myntri Rangbahduh, u Narendra Modi u la peit bniah ha kaba u la kren ruh shaphang jong ki ha ka prokram Maan Ki Baat. U Assam Lemon lane u sohjew na Assam u dei uba pynkit man ka por sha London bad ka Middle East bad haduh mynta, la dep shalan palat 50 MT u sohjew na Assam.
Wat ha ka por jong ka khlam Covid-19, ka APEDA kam shym la ran dien ha ki kam bad ka la bteng ban kyntiew ïa ki jingpynkhreh ban shalan mar lyngba ka Virtual Buyer Seller Meet ha ka jingïatreilang bad ki Embassy of India kiba don ha ki ri bapher bapher ban ïakren bad ki nongthied bad ki FPO/FPC na ka thaiñ Shatei Lammihngi shaphang ka jingpynbiang ïa ki sohtrun, u sying, u sohjew, u Soh ñiamtra bad kiwei kiwei. Ka APEDA ka la pynlong ruh ïa ki Virtual Trade Fair ha ki por jong ka khlam bad ka la plié lad ïa ka jingshalan mar sha ki ri bapher bapher.
Ka APEDA ka la pynkhreh ruh ban sdang ïa ki projek bapher bapher kum ka jingpyntbit ïa 80 ngut ki nongseng kam lajong bad ki nongshalan mar na ka thain, ki Farmer Producer Organization (FPO) bad ki Farmer Producer Company (FPC) bad ruh ki ophisar Sorkar jylla, ban pynlong ka jingai jinghikai bad pyntbit ha ki kam pynkhreh ïa ki mar bam, ka jingkyntiew ïa ki mar bad kiwei kiwei.
Ka APEDA ka la ai jingkyrshan ruh ïa ka thaiñ Shatei Lammihngi ban pynsaphriang jingtip bad kyntiew ïa ki mar na ka thain kum ka KIWI Wine, ki mar bam ba la pynkhreh, ban pynlong ïa ka jingpyrshang ïa ka Joha Rice Pulao, Black Rice kheer, bad kiwei kiwei.