Shillong, Nohprah 14: U Director ka NEIGRIHMS u Prof. Dr. Nalin Mehta u la plie paidbah ban pyndonkam ïa ka kor test snam kaba nyngkong ha Meghalaya kaba dei ka Polymerase Chain Reaction (PCR) kaba lah ban pyndonkam ruh ban test Nucleic Acid Testing ha ka shnat Transfusion Medicine and Blood Centre, NEIGRIHMS.
Ka Nucleic acid testing ka dei ka mashin ban peit bad bishar bniah ïa ka snam ban pynthikna ba ka snam kaba la ai da ki briew kan nym don kano kano ka jingdon ïa ki khniang jingpang bad kane ka ïarap ban ïada ïa kiba pang shitom haba ki shah ai snam.
Ha kane ka juk mynta ki jaka ai jingsumar ki long shisha kiba phikir ha kaba shim snam ne ai snam, ban pynthikna ba ka snam kaba shim bad ai kan long kaba khuid kiba lait na ki jingpang kum ka HIV bad Hepatitis B, Hepatitis C, Syphilis, Malaria, CMV, HTLV bad kiwei kiwei.
Kane ka mashin NAT ka lah ban lap lada don ki khniang jingpang ha ka snam jong ki briew bad ha kane ka mashin lah ban test san jait ki jingpang ha kajuh ka por kiba la pynthikna da ki kyndon kiba la buh da ka Drugs Licensing.
Kine ki kor ki bor kiba thymmai kan ïarap ha kaba test kum ka PCR/TMA pynshong nongrim ha ka NAT bad kane ka ïarap ban ïoh ïa ka snam kaba khuid haba ai sha ki briew ha ka pang ka shitom.
Da ka jingdon kane ka mashin ha katei ka hospital kaba heh kan long kawei pat ka atiar ban sumar ïa ki nongpang kane ka thaiñ shatei lammihngi ka Ri India bad ha kane ka jaka lah ban ïoh ïa ka jaka test snam kaba katkum kane ka juk mynta ha kane ka thaiñ.
