Shillong, Nailur 27 : Ka Myntri ka Koit ka Khiah ka Dr Ampareen Lyngdoh, mynta ka sngi Thohdieng, kala plie paidbah ïa ka Referral Unit (RU) ba nyngkong eh ha Mawphlang Community Health Centre (CHC).
Haba kren ha ka jingïalang, ka Myntri kala ban jur ïa ka jingdonkam ban shaniah ïa ki jaka sumar ka Sorkar haba kdat sharud ïa ka jingmut jingpyrkhat ba ki dei ki bym biang satia ïa ki lad jingsumar.
Kala ban ruh ba ka thong jong ka Sorkar ka long ban rah shajan ïa ki lad jingsumar kiba paka sha ki longïing ha ki shnong ki thaw.
Ka Myntri ka ong ba ka Mawphlang CHC kala nang kyntiew ïa ki tiar sumar bad don haduh 5 ngut ki doktor, uwei u doktor Specialist, laingut ki doktor bniat bad uwei u doktor Ayush. Ka CHC kala lah ban leh haduh 39 tylli ki medical test, kaba la ïarap ïa ki paidbah ban ym wan shaduh sha Shillong.
Ha kajuh ka por, ka Myntri kala kyntu ïa ki Nongshong shnong ban pynrung kyrteng ïalade hapoh ka Meghalaya Health Insurance Scheme (MHIS) bad ban pynïasoh bad u Aadhaar ban ïoh ïa ki jingsumar ei.
