Nongpoh, Rymphang 02: Ka myntri sorkar ba dei peit ïa ka tnad ka koit ka khiah hapoh ka jylla, ka Dr. Mazel Ampareen Lyngdoh mynta ka sngi kum ka myntri sorkar, ka la leit ban plie paidbah ïa ka jingsdang rakhe ïa ka jubili rupa ka Seng Samla Shnong Nongthymmai 14&15mer ba hap ha ka thaiñ Byrnihat ha Ri Bhoi District.
Haba leit ban plie paidbah ïa kane ka jingrakhe ïa katei ka jubili rupa ka Seng Samla Shnong Nongthymmai 14&15 Mer, la synran lang ruh ïa ka Dr. Mazel Ampareen Lyngdoh da ka jigndon lang u MLA ka Jirang Constituency, u Bah Sosthenes Sohtun, u MDC ka Jirang u Bah Victor Rani, u Rev. S. Swer, u Bah Kendrowel Lapang, President ka Synjuk ki Rangbah Shnong, u Bah Aritson Khongstid, president ka Seng Samla bad kynthup ruh naduh ki longkmie ki longkpa, ki samla bad ki paidbah nongshong shnong ka shnong Nongthymmai 14&15 mer.
Ka seng Samla ka la pynlong ruh ïa kane ka jingrakhe jubili rupa, ka long shi bynta ban phai dien sha ki 25 tylli ki snem ba ka Seng Samla ka la shakri hapoh ka shnong bad kum ka jingai burom ïa ki nongïalam barim ka Seng Samla, ki nongïalam ka seng Samla ha kane ka sngi ki la pynkup burom ruh ïa ki nongïalam barim ka seng samla, ki nongïalam shnong bad ki Longkmie longkpa, kiba la don bynta ha kaba ïa shakri lang na ka bytna ka bha ka mait jong ka shnong ka thaw.
Haba ai jingkren ha kane ka sngi kum ka kongsan, ka Dr. Mazel Ampareen Lyngdoh ka la ai ka jingïaroh ïa ki nongïalam ka seng samla, kiba la kynmaw ban phai dien sha ka jingïaid lynti ba 25 snem naduh ba la seng ïa kane ka seng samla ha u snem 1999 bad kum ka myntri ka ïaroh ruh ba kum ki samla ka ngeit skhem ba ki la ai ka jingshakri kaba bha tam hapoh ka shnong rygnkat ka jingïatrei lang bad ka sorkar shnong.
Ka la ong ruh ba ki samla ki long kita ki iktiar ba khlaiñ bha ban saindur ïa ka bha ka miat jong ka imlang ka sahlang bad kum ka myntri sorkar ka la kyntu ruh ïa kine ki nongïalam ka seng samla ba kin dang ai ka jingshakri kabab ha tam sha ka imlang ka sahlang da kaba kin ïatrei ryngkat ryngkat bad ka bor shnong.
Shuh shuh, ka la pynpaw ruh da kaba ong ba kum ka myntri sorkar kan dang ai ka jingshakri kaba bha tam sha ki paidbah ka jylla bad ka kloi ruh ban ai ka jingïatrei lang bad kine ki samla na ka bynta ban dang saindur ïa ka shnong ka thaw lada ki donkam ha kano kano ka por, ka la bynrap.
Ha kane ka jingplie ïa kane ka jingrakhe ïa ka jubili rupa la pynphuh pynphieng ruh da ki jingrwai, ki jingshad bad kiwei kiwei ki prokram ba la shim bynta da ki khun samla ka shnong.
