Nongpoh, Naitung, 23: Ka Dorbar Shnong Pahamsyiem ha ka sngi Ba lang ka la pynbna paidbah kam banse ban hap ban pynsangeh noh ïa ka jingpynkhalai nusib kaba la mut ban pynïalehkai ha ka 24 tarik mynta u bnai.
Haba kren sha ki lad pathai khubor na ka liang u Bah Jedwin Lyngdoh Rangbah Shnong u la pynpaw ba kum ka Dorbar Shnong hi baroh kawei ka dap da ka jingsngewkhia kaba jur ba ïa katei ka jingpynkhalai nusib la hap ban pynsangeh noh namar ba ki don ki briew kiba shim ïa ki tiket ban pyndie hynrei ynda la dei ka por ban lum noh ïa ki kim shym la pynphai ïa ki tiket bad ki rusit ba la dep die.
U la ïathuh ruh ba ka jingbym ioh lum lut ïa ki tiket ba la dep die ka la pynlong ïa ka Dorbar Shnong Pahamsyiem ban hap ban shim ïa ka rai ban pynsangeh syndon, watla ka la poi ka sngi ban pynïalehkai bad kyrpad ruh ïa ki paidbah kiba la thied ïa ki tiket ba kim dei ban khuslai, namar na ka liang ka Dorbar Shnong kan sa pynphai lut ïa ka pisa bad ki hap ruh ban wanrah ryngkat ïa ka tiket ban pynshisha ha ka por ba ki wan shim bad ïa ka Tarik ban sa pynphai ïa ka pisa yn sa pynbna shen lyngba ki lad pathai khubor, u la bynrap.
