Phra tylli ki mat ba kongsan pynsngew ka HYC ha u Dr. Ricky AJ Syngkon

Nongstoiñ, Risaw, 20: Ka seng Hynñiewtrep Youth’s Council Ri Muliang Circle ha ka jingïakynduh dang shen, ka la ïoh ban buh dorkhas hakhmat u MP Shillong Parliamentary seat u Dr Ricky AJ Syngkon, halor ki phra tylli ki mat kita, ki long ban tuklar lem ïa ka ban pynbeit noh kham kloi ïa u pud u sam na ka bynta ka wat ba ar na ka bynta ka Langpih Sector.
Kawei pat ban pynïoh bording ïa ki shnong Khasi kiba shah pyndik barabor ha ka Assam kum ha Umyiap, Mawdiangsnam, Domtiewsaw, Umbah Darphang Umpha. Ban tuklar lem ïa ka jingpyntrei jubor jong ka Assam ïa ki kam pynroi, khlem da burom lem ïa ka jingsngew jong ki nongshong shnong ka Jylla Meghalaya. Kumjuh ban kyntiew noh ïa ka Langpih AD Camp sha ka Police Outpost.
Ban maramot ïa ka surok na Ktiehthawiar shaduh Langpih lyngba ka skhim PMGSY, ban mang kham kyrpang ïa ki kam pynroi lyngba ki skhim na ka sorkar kmie ha ki khap border bad border Meghalaya Assam. Ban ïarap lem ïa ka jinghiar dor ki mar rep kum synsar, u sying bad kiwei kiwei bad kyntiew bad kyrshan kham bha ïa ki Co-operative society lyngba ki skhim ka Sorkar.
Kumjuh ka HYC Ri Muliang Circle lyngba kane ka kyrwoh khubor, ka kwah ban kyrpad ïa u MP ba don burom ban ïarap kyntiew noh ïa ka surok na Rwiang Tynghor haduh Athiabari da ka Intermediate Lane, kum shibynta ban pynkhreh ïa ka jingïaseng Synod ka ban long ha u snem 2034 ha ka Balang Presbyterian Tynghor, ong ka kyrwoh khubor na u samla Ritly Thongni Assistant Secretary HYC Ri Muliang Circle.