Shillong Lber 10: U Myntri Rangbah ka jylla u Conrad K Sangma ha ka sngi Nyngkong u la ong ba ka jingphong ïa ka sopti ba la thaiñ da u skai Ryndia dei ban ai ka jingkyrshan da baroh ki dkhot ha kaba kane kan ïarap ïa ka jingkiew ha ka kam thaiñ ha ka jylla baroh kawei. Na ka liang jong u Sangma u la pynthikna ruh ba un sa phah rah ïa ki sopti jaiñ ryndia ha ka ophis u Myntri Rangbah ruh ka ri bad ki myntri ka sorkar pdeng.
Haba kren ha ïing dorbar da kaba phong ïa ka sopti jaiñ ryndia u Sangma u la ong, “Kane ka dei ka sopti kaba nga la phong kaba la shna da u sai Ryndia ne Eri bad ïa kane ka sopti la shna bad thaiñ ha Meghalaya. Kane ka dei ka sopti kaba suk bha ban phong bad kane ka jingphong ïa kane ka sopti ka dei ruh ban pyni ba ki briew jong ka jylla ki la lah ban pynmih ïa kane ka sopti kaba la thaiñ na u niang ryndia. Nga la ïoh kum kine ki sopti haduh 15 tylli bad nga phong ruh manla ka por naba nga sngewsuk.”
Na ka liang u Sangma u la ong ba wat ki myntri ka sorkar pdeng ki la shim ba kane ka jingphong ïa ka sopti u ba la thaiñ da u niang ryndia ka long kaba biang tam, “Ha ka sngi ba nga phong ïa kane ka sopti nga la leit ruh ban kynduh ïa ki myntri ka sorkar pdeng. Na ka liang u Myntri ka tnat Pule puthi ka sorkar pdeng u Dharmendra Pradhan u la ong ba dei ban phah lem ïa kane ka sopti ba la thaiñ da u ksai ryndia na ka bynta ban shna ïa ki sopti kum ki Kurta bad kiwei pat ki sopti.”
“Ïa kane ka juh ka sopti ngin sa phah sha ka ophis u Prime Minister bad kiwei pat ki myntri ka kynhun myntri ka sorkar pdeng khnang ba kin lah ban kyntiew ïa ka kam thaiñ jaiñ bad kumjuh ruh ban pynïaid ïew ïa ki,” u la ïathuh.
“Nga kwah ban kyntu ïa ki dkhot ba kin kyntiew ïa kane ka jingphong ïa ka sopti na la ka jylla ha kaba kane kan kyntiew ïa ki kam thaiñ jaiñ ha ka jylla bad khamtam eh kaba la leh da ki kynhun SHG. Kane kadei kaba rit hynrei ka khubor pat ka long kaba heh,” ong u Myntri Rangbah ka jylla.
U la pyntip ruh ba u Bah Iaishah Rymbai, uba la seng ïa ka Eri Weave Pvt Ltd, u la lah ban kamai haduh T. 20 lak lak bad ka 12% equity ha ka Shark Tank Indian Season 4, na ka liang u Myntri Rangbah u la ong, “Kane ka dei ka khubor bad ka jingpynphalang ba ka sorkar ka kyrshan na ka bynta ban pynmih ïa ki kam ki jam bad ka ïoh ka kot jong ki nongshong shnong.”
