Shillong, Lber 10: U Myntri na khmih ïa ka Power Abu Taher Mondal ha ka sngi Nyngkong ïa la pyntip ba ïa ka revised project cost na ka bynta ban kyntiew ïa ka dor Mawlai Sub-station na ka 3×20 MVA sha ka 3×50 MVA kaba hab hapoh ka NESIDS-OTRI scheme na ka dor T. 49.8 klur sha ka T. 79.23 klur la dep ban mang da ka Ministry jong ka DoNER ha ka 16 tarik u Kyllalyngkot, 2025.
Haba jubab ha ka dorbar mang tyngka ha ka kynta jingkylli u Mondal u la ong, “Na ka daw jong ka jingkiew ha ka dor jong ka project, na ka liang ka jingai bhah jong ka sorkar pdeng ka la buh pud bad ka la pynskhem ïa ka jingmang kaba long T. 49.8 klur da kaba ai ruh ïa ka mang pisa kaba bynrap T. 29.43 klur kaba dei ruh ban sei da ka sorkar jylla.”
U la pyntip ruh ba ïa kane jingpyntreikam la sdang da ka Meghalaya Power Transmission Corporation Limited (MePTCL).
Ha kaba ïadei bad ka jingkylli ba la wanrah da u MLA ka Mawlai u Bah Brightstarwell Marbaniang, na ka liang jong u Mondal u la pynthikna, “Ngin pyrshang ban pynlongkam kloi ïa kane ka project na ka jingdonkam ban buh ïa ka sub-station ka long kaba donkam bha ha nongbah Shillong.”
