Phim lah ban leh eiei ïa kano kano ka kam khlem ïatreilang hapoh ka kynhun: Shrikant M. Vaidya

Shillong, Risaw 31: U Chairman barim ka Indian Oil Corporation Ltd u Shrikant M Vaidya u la ong ïa ki samla pule ka National Institute of Technology Meghalaya, ba kim lah satia ban trei ïa kano kano ka kam khlem ka jingïatreilang hapoh ka kynhun ne team work bad ka jinglah ban leh ïa kano kano ka kam ne possibility kadei kaba bymjukut bad ong ruh ba ka ïoh ka kot ha India ka la kiew bad dei ban shim kabu ïa kane.
Ïa kane u la ong ha ka prokram jingpynkup burom kaba 12 ka Annual Convocation, ha Sohra Campus, Meghalaya bad ha kane ka prokram, baroh kiba la shah pynkupburom ki long 250 ngut, kiba kynthup na ka kyrdan pule B.Tech 153 ngut, M.Tech 24 ngut, M.Sc. 36 ngut, Ph.D 37 ngut.
Ki samla pule ba shah pynkupburom ki long na ka subject pule Civil Engeneering, Computer Science Engineering, Electronic And Communication Engineering, Mechanical engineering, Chemistry, Methematics, Physics, Humanities and Social Sciences.
Kum u kongsan u la ong, “Ba mynta ba phi la ïoh ïa kane ka kyrdan ym lah ban tip pat hadien 40 snem sha kano ka kyrdan phi lah ban poi, bad ka jingïoh kyrdan jong phi mynta kadei na ka daw jong ka NIT.”
U la pynshlur ruh ïa ki samla pule ba kidei ban long kiba shaniah halade bad ym tang ha ka jingnang jingstad. U la ong ba ka NIT ka long kum u symbai na ka bynta jong ki bad mynta ka shong pat ha ki ban long kiba phuh ban heh ban san na ka bynta ka jingmyntoi jong ka ri.
“Ha ka por ba don Covid lada shah ktah ka karkhana umphiang ka ri ka lah ban shah ktah, hynrei ka jingtrei shitom jong ki nongtrei kiba don hapoh Indian Oil la lah ban pynbiang ka jingdonkam jong ki nongshong shnong ka ri,” u la ïathuh.
U la ong, “Ha ka por ba don ka thma Russia Ukraine ka dor umphniang ka poi 100 dolar bad ka long kaba eh bha ban pynbiang ïa baroh ki jingdonkam hapoh ka ri, hynrei da ka jingtrei shitom jong baroh kiba trei hapoh ka Oil Coorporation la lah ban pynbeit ïa kane ka jingeh.”
“Lada phi mad ïa kino kino ki jingeh ha ka kam ba phi trei ne kino kino ki jingjia phi hap long kiba jai jai, namar ki jingeh kin kut ym dei ba ki neh sah, dei ban long kiba ïasoh lang bad ïatreilang, dei ban don ka dor bad ban ïalam ïa ka ri shakhmat,” u la ong.
U la bynrap, “Mynta ha ka pyrthei technology, ka bun ka mynsiem artatien kaei kaba ngan trei hadien ynda la dep ka kyrdan pule bad ka kyntien ban kylli katno ngan kamai kam long kaba biang namar kadei ka kyntien secondary, hynrei ka kyntien katno phin nohsynniang ka long kaba kongsan bha.”
“Ha kane ka jingpyndep ïa ki jingpule ha ki kyrdan bapher bapher kadei ka kam kaba paka, hynrei ym dei ban kutnoh hynrei dei ban pule biang ne re-learn, phi dei ban ïai pule watba phi la trei, ka jingkyllon, ka jingjynthut kin pynkylla ïa ka jingartatien jong phi, hynrei ym dei pat ban pynpulom ne mar ka jingpulom ha kino kino ki kam ki long ka jingma ïa phi,” u la bynrap.
U la ong, Kawei ka jingpyrshang kan ïarap ïa ka jingim jong phi bad kata kadei ban buh thong ïa ka kam shakri, ym dei ban shu khluid hynrei ban long kiba la thnam kum ka um, naba ka jynhaw ka pynkhih bad pynïaid ïa ka kali.”
Katba u Symbud Kongsan u Prof. Dhirendra Nath Buragohain, Founder Director and Emeritus, Professor IIT Guwahati u la ong ba ka jingpyndep ia ki kyrdan pule bapher bapher ka dang dei tang ka jingsdang. “Nangne shakhmat phi hap ban ksaid bad ban khih ban ksar hapoh ka jingim jong phi bad shim ba kane ka sngi kan pynkynmaw ba ka dei ka jingsdang jong ka jingim naba nangne shakhmat phi hap ban kynduh bun ki jingeh katba phi dang kiew ban kynjoh ïa ki kam ha ka jingim,” u la pynpaw.
“Ym lah ban pynsangeh ïa phi lait na ka bor pyrkhat. Phin sa lah ban tip bad lah pynbeit ïa ki jingeh tang lada phi la mad ïa ki bad ka jingpule hangne ka long tang ka nongrim bad kadei ïaphi ban wad ki lad pynbeit ïa ki jingeh ha ka jingim. Bun na ki nongshong shnong ha kane ka ri ki don ka jingpang long mraw naba ki kwah ban shu ap beit ïa kiwei ban leh, bad kim ju pyndonkam ïa ka jingnang jingtip kumno ban rai ïa ki jingeh. Lada phi kwah ban ïohi ïa ki ri ba kiew leit sha surok ban peit ïa ka jingkhapngiah ne jingbym kheiñ snep, namar don ki nongshong shnong kiba ju leit bar ri bad yn da poi ha ri la jong ki long pathar bad ki pynjaboh katba mon,” u la ong.
U la bynrap, “Kaei kaba phi long mynta ka dei ban ïarap wanrah jingkylla da kaba noh synniang sha ka imlang sahlang bad dei maphi ban rai kaei ba phi dei ban leh bad ka kyntien bym lah ban long (impossible) kan long kaba lah ban long (possible) lada pyndonkam hok ïa ka jingnang jingtip naba ka pyrthei kadei ka jong phi.”
Ha kane ka prokram la ïoh ruh ka jingkren na u Chairperson Board of Governors NITM u Sunil Alagh, uba dei u President of Convocation, bad la aiti ïa ki syrnot bad khusnam da u Chairman Senate u Prof. Pinakeswar Mahanta uba long ruh u Director uba la ai ïa ka kaiphod treikam jong ka NIT Meghalaya, nangta la don ka jingaiti ïa ki Medal, ka jingshim jingkular da kiba la pyndep degree bad kiwei kiwei.
U kongsan, u la sam ïa ki khusnam sha ki 5 ngut kiba la ïoh ïa ka Gold Medalist ba kynthup ïa ka President Gold Medalist, Chairperson’s Gold Medalist, bad ka Institute Gold Medalist.
Katba u Symbud Kongsan u la sam ïa ki Institute Silver Medalists kiba don kumba 10 ngut nalor kiwei kiwei pat ki prokram.