Nongstoiñ, K’lyngkot, 10: Watla ki paitbah ki beiñ ki khoh ïa ki nongïaalam jong ka National Peoples Party (NPP) hynrei ha West Khasi Hills ki paitbah jong ka Rambrai Jyrngam Constituency ha kane ka kynti ki phai khmat sha ka NPP ban pynïasoh kum ki nongkyrshan bapura jong ka Party.
Ïa ki nongïalam bad ki nongkyrshan jong u MLA ka Rambrai Constituency la pdiang sngewbha sha ka NPP Rambrai Jyrngam Constituency ha ka sngi Thohdieng da u President jong ka NPP Rambrai Jyrngam u Bah Kimfa S.Marbañiang uba long ruh u kyrtong jong ka NPP ban aireng ha ka elekshon MDC ka ban sa long ha ka 21 tarik Rymphang, 2025.
Ha ka jingïalang pdiang burom kaba la long ha phyllaw ïng jong u President ka party ha Rambrai la pynïaaid da u Vice President u Bah D.A.Lyngdoh.
Kiba la pynïaasoh sha ka NPP ki long u Bah Iskarland Nongsiej na Rambrai, u Bah Bhalanglin Kharlyngdoh na Athiabari, u Bah Pynshlurlang Lyngdoh uba dei ruh u President jong ka kynhun ba kyrshan ïa u MLA ba mynta ka Rambrai, u Bah Rostar Marbaniang uba ong u nongkyrshan ka HSPDP, u Bah Postrar Marngar uba la long u nongïalam ba hakhmat eh jong ka Voice of the People Party (VPP) ha ka Election MP bad bun ki nongïaalam ba hakhmat jong ka Congress.
U Bah B.I Nongsiej u la pynpaw ba kum u nongïalam paitbah ha ka thaiñ Rambrai u la pynïaasoh sha ka NPP namarba u ïaohi ba ka jingbym don jong ki nongmihkhmat ha ka liang Sorkar ka long ka jingduhnong kaba khraw ïaa ki paitbah bad ka Constituency hi baroh kawei.
“Dei halor kane ka nongrim ba ma u bad ki paralok kiba la kyrshan met bad mynsiem ïaa u MLA ba mynta ki la hap ban pynïasoh noh bad ka NPP kaba ïalam mynta ïa ka Sorkar namarba ka Rambrai Jyrngam Constituency ka dang don kam shibun bah ki kam pynroi,” u la ong.
U Bah Kimfa u la aikhublei bad pynpaw ka jingsngew nguh ïa ki rangbah bad ïa ki nongïalam na kiwei pat ki party kiba la ai mynsiem ïa u ba un ïakhun ia ka elekshon MDC.
U la ong ruh, lymda dei na ka jingai mynsiem jong ki paitbah bad ki riewrangbah u la don ha ka jingartatien bad ka jingrit mynsiem la un ïaleh biang ne un sangeh noh.
