Shillong, K’ Lyngkot 10: Ka khubor ba la ïoh na ki Pulit la ïathuh ba kawei ka longkmie kaba dei ka nongshong shnong jong ka Tura, West Garo Hills ) ka la ujor ba ha ka 23 tarik u Nohprah, 2024, la pyllait ïa ka ram kaba T. 4.5 lak da ka online lyngba ka Axis Bank WhatsApp Application, na kane kumba T. 1,11,484 la sei na kaba sah kaba rim bad T.. 3,38,516 ka sah hapoh ka Bank Account jong ka.
Hynrei ha ka 26 tarik, Nohprah, 2024, ka la ïohpdiang ïa kawei ka jingshah telephone, ha kaba u nongkren u la kam ba u dei u nongtrei napoh ka Axis Bank Customer Care uba la pan na ka ïa ki jingtip ba bniah shaphang ka Debit Card jong ka, ha ka por ba la dang plie ïa ka EMI jong ka, ka la ïohpdiang biang sa kawei ka jingshah telephone ba la bthah ïa ka ban download kawei ka application bad la kyrpad ïa ka ban ïathuh ïa ka OTP number, ha kaba ka la mynjur. Hynrei tang mar shu ïathuh ïa ka OTP ka la shem ba baroh ka pisa kaba don hapoh ka Bank la shah sei lut baroh.
Ha kawei pat ka jingjia ki Pulit ki la ïathuh ba u Huinseng A Sangma jong ka shnong Jenggitchakgre (WGH) u la phah ka jingujor ba uwei uba kyrteng u Ginseng M Sangma u la shim kylliang ka pisa kumba T. 6.3 lak na u da kaba kular ba un sa siew biang ïa kane ka pisa ha ka 18 tarik u Nailur, 2024 ha ka ryngkat bad ka sut kaba long T. 2.1 lak. Hynrei utei uba la shim kylliang u khlem da la lah satia ban siew biang ïa katei ka pisa.
Ki pulit ki la pyntip ba u Coy Commander, G-Coy, 50th Bn., BSF u la phah ka jingujor ba ha ka 4 tarik mynta u bnai, ki shipai BSF ki la lap ba ka jingker sainar shiah kaba don ha u pud u sam hapdeng ka India Bangladesh kaba don hapdeng ka Picket No. 1740 bad 1741, PFL No. 37 TC 38 kaba hapoh ka BOP Kalaichar (SWGH), la don ba pynjulor.
Ha kawei pat ka jingjia ki Pulit ki la pyntip ba ha ka 5 tarik mynta u bnai, hadien ka jingïoh jingtip kaba thikna ki Pulit ki la ïoh ban khang kdong ïa kawei ka thuk thuk kaba don u nombar ML-08D-4098 ba la niah da u Jamer Ali ba la 28 snem ka rta ha SH-12 Road hajan ïew Chandamari bad ki la lap bad kurup na u ïa u suba drok u ba khia kumba 11.1 gram.
