Phaikhmat ka Toyota ban pynïaid ïew ïa ki kali sha NE, angnud ban pyntreikam ïa ka CSR

Bengaluru, Naitung, 20: Toyota Kirloskar Motor Private Limited (TKM), kawei naki kompani pynmih kali kaba heh haka ri India ka la nang pynjanai shuh shuh ïa ka rukom shna bad pynmih ïa ki kali, khamtam da kaba wanrah ruh ïa ki sienjam ban pynduna ïa ka jingpynmih Carbon ne Carbon Neutrality, kiba dei ki kali ki bym pynjaboh ïa ka mei mariang nalor ba ki dei ki kali kiba shna bad pynmih na kane ka ri hadien ka jingïatehlok ka Kirloskar Systems Ltd. bad Toyota Motor Corporation (TMC) ban buh ruh kawei ka ajak shna bad pynmih kali kaba heh ha Bengaluru, Karnataka.
Dang ha kine ki khyndiat sngi na ka liang ka Toyota Kirloskar Motor Private Limited (TKM), ka la lum ruh ïa ki nongthoh khubor na ka thaiñ Shatei Lam Mihngi ban sakhi ïa ka jaka shna bad pynmih kali jong ka Toyota kaba don ha Bidadi, Bengaluru jong ka jylla Karnataka, bad ruh ban pynpaw pyrthei ïa ki kam kiba la Toyota ka la leh na ka bynta ka jingmyntoi jong ki paidbah naduh ki skhim CSR, ka jingsumar bad pynneh pynsah ïa ka mei mariang nalor ka jingpynmih ïa ki kali thymmai kiba ïaid da ka bording elektrik bad ruh ki bym pynmih jaboh.
Nalor ka thong kaba la don lypa ban wanrah ïa ka sienjam bad ban shna ïa ki kali kiba duna ka jingpynmih jaboh, na ka liang ka TKM dang shen ka la ïaoi ruh ïa ka soskular ïasngewthuh jingmut ne ka MoU bad ka Ohmium International ban thaw lang ïa ka Green Hydrogen kum kawei na ki lad ban pyndonkam ha ki kali ban lait na ka jingpynjaboh mariang nalor ki kali kiba ju pyndonkam da ka Umphniang bad kumjuh ruh ka bording elektrik.
Ka TKM ka la treikam palat 27 snem haka ri naduh ba la seng ha u snem 1997 bad kadei kawei na ki kompani kaba la kiew sted bad ruh ba ki paidbah ki shaniah ban pyndonkam ïa ki jait kali Toyota naduh kiba rit haduh kiba heh bad katei ka jaka shna kali jong ka TKM ka don ha Bidadi, Karnataka, ka don ka jingheh kumba 432 akar bad ka lah ruh ban pynmih haduh 3,42,000 tylli ki kali haka shisnem bad kadei kawei ruh na ki karkhana aikam ïa ki khun samla na kylleng ka ri kaba don ruh ka thong ban ïatynjuh bor bad ki ri ka pyrthei.
Kumba long mynta ka kompani Toyota ka pynmih ïa ki jait kali kiba la tip kum ki Strong Hybrid Electric Vehicle, Plug-in Hybrid Electric Vehicle, Battery Electric Vehicle bad Fuel Cell Electric Vehicle kiba pynduna ka jingpynmih Carbon bad ïahap bad ka thong jong ka ri.
Nalor ka jingsakhi ïa ka rukom shna, ka rukom pynmih ïa ki kali, ka kompani Toyota ka la leh ruh shibun ki kam kiba ïadei bad ka imlang ka sahlang ban ai jingmyntoi sha ki paidbah lyngba ka Corporate Social Responsibility haka ri, bad mynta ka kynti katei ka kompani ka la sdang ban phai khmat sa sha ka thaiñ Shatei Lam Mihngi jong ka Ri India ban pynïaid iew ïa kitei ki kali bad khamtam ban phaikhmat ka jingpyntreikam ïa ki skhim CSR bad kumjuh ruh ban lum ïa ki khynnah donsap kiba wan na ki longiing ba duk ba rangli kiban ioh ïa ki jinghikai ban pyntbit ha ki liang bapher bapher, kumba katei ka kompani ka don ruh ïa ka Toyota Technical Training Institute (TTTI) kaba ai jinghikai pyntbit ba lai snem haka skul kyrpang ryngkat ka jingthung kam kaba thikna.
Haka jingïalang kaba la shong hapdeng ki nongthoh khubor ki jylla NE bad ki heh jong ka Toyota, ba kynthup naduh u G. Shankara Executive Vice President Finance & Administration, Sudeep Dalvi Chief Communication Officer, Senior Vice President & Head – State Affairs, Arun Nair Vice President, Chief Representative – East Region Sales-Service- Used Car bad kiwei kiwei la ioh ruh ban ïa tai bad mir jingmut ha kiba bun ki liang hadien ka Toyota ka la pyrshang ban pyniar ïa ka tnad treikam sha ka thaiñ NE, khamtam ka jingmyntoi jong ki paidbah, nalor ki kali kiba ka pynmih ban shakri sha ki paidbah.
Haka jingïathir bad ki nongthoh khubor, kitei ki heh jong ka Toyota ki la pynpaw ïa shibun ki kam ba ka Toyota ka la leh nalor ki kam pynmih kali, khamtam haka jylla Karnataka ba don katei ka jaka shna kali, hynrei ki la pynpaw ba ki don ka thong bad ka jingangnud ban phaikhmat bad pyniar ïa ka tnad sa sha ka thaiñ Shatei Lam Mihngi ka ban long ka jingkyrkhu bad ka jingmyntoi na ka bynta ki paidbah ha kaba ïadei bad shibun ki liang.