Shillong, Rymphang 20: Ka Sorkar Jylla lyngba ka Tnad ka Koit ka Khiah kala phaikhmat mynta ban leit rung hi noh ha manla ki thliew ïing ha ki Shnong Nongkyndong ban ai injek tika Covid-19.
“Ngi la phaikhmat ban leit rung ïing hi noh ha kaba ki Nongai injek kin ai injek tika sha baroh ki Longïing ha ki jaka Nongkyndong” ong u Sampath Kumar, Principal Secretary ka Tnad Health & Family Welfare.
Kat kum ka jingong jong u, ka long kaba eh ïa ki paid nongkyndong ba kin ieh ïa ka jingbylla tang ban wan ai injek tika bala pynkhreh da ka Sorkar haba bynrap ba ka jingnang bun kiba ai injek ka dei namar ka jingiatreilang jong ki paidbah kiba na nongkyndong.
“Ngi dang shong bishar ïa kane ka kam (ai injek) manla ka taiew bad ban khmih ba ka jingwan ai injek tika ka dei ban kiew” ula ong.
Haba pynpaw ba ka jingïabit jingpang Covid-19 kala nang hiar haba ïa nujor bad u bnai bala lah, u Sampath ula ong ba kane ka dei ka dak kaba bha bad ka Sorkar kala pyrshang katba lah ban pynthikna ba baroh ki Nongshongshnong ki bym pat shah kynthup ha ka thup ban ïoh injek, ki dei ban ïoh noh.
“Haduh 72% na ki nongshongshnong kila dep ai injek ha Jylla Meghalaya. Kane ka dei ka jingiada ba nyngkong eh. Ngi la pynleit jingmut ruh mynta sha ka second dose namar bun bha ki briew kila dei ban ïoh ïa kane ka tika” ula pyntip.
Une u Heh Ophisar ula bynrap ba ka Sorkar kala shim ruh ïa ka sienjam ban pynthikna ba baroh ki khynnah kiba hapdeng 15-18 snem kin ïoh injek noh khamtam ba ka Jylla kala sdang ban plie ïa ki skul.
Haba kylli, u Sampath ula ong ba ki don katto katne ki District kiba hap ban phaikhmat bha sha ki jaka nongkyn dong. Ula ai nuksa ïa ka West Garo Hills kaba don bun eh ki jaka nongkyndong hynrei kala kynjoh 100% kiba la dep injek katba katto katne ki jaka ha East Khasi Hills bad South Garo Hills ki dei ïa kiba hap leit rung.
“Ka West Khasi Hills bad ka District thymmai Eastern West Khasi Hills ruh ki donkam ïa ka jingpynjanai ha ka jingai injek tika ïa ki nongshongshnong. Ki Deputy Commissioner kila shim mynta ïa ki sienjam ban leh eiei halor kane ka bynta” ula ong.
Ha kajuh ka por, une u Principal Secretary ula ai jingiaroh ruh ïa ka jingshimkhia ki paidbah ban iada ïalade na ka jingsaphriang jong ka khlam hapoh ka Jylla.
U pyntip ba ka IIPH Shillong kala pynlong ïa ka jingwad bniah da kaba shim nuksa ïa ka snam na ki 6000 ngut ki briew ha baroh kawei ka Jylla ban khmih la ki dei ki don ïa ki antibodies ba ïadei bad ka Covid-19.
“Ïa kane la leh ha u bnai Nailur, Risaw, Naiwieng tad haduh ba kut ka Delta Wave (jinglynshop u khniang Delta) bad ka kaiphod ka pyni ba ka jingïabit jingpang ka long tang 42%. Kane ka mut ba bun bah ki briew kila iada ïa ka jingïabit jingpang da kaba deng ïa ki mask, pynjngai ïalade na kiwei pat bad kiwei kiwei” ula ong.