Phah tuklar ka HPC ha u Amit Shah ban pynkut noh ïa ki jingeh ha Them Metor

Shillong, Lber, 12: Ka Harijan Panchayati Committee (HPC) ha ka sngi Baar ka la phah da ka jingthoh sha u Myntri ka tnat Kam Pohing u Amit Shah da kaba kyrpad ba un tuklar lem halor ki kynrum kynram jong ka Them Metor da ka jingïatreilang hapdeng ki lai kynhun, ka Sorkar Meghalaya, ka Harijan Panchayat Committee (HPC) bad ki kynhun bapher bapher.
Ka Committee ka la kyntu ruh ïa ka Sorkar Pdeng ban phah tohkit halor ka jingbthei u bom IED dang shen ha jaka ieng ki Syndicate Bus kaba la pynsyier mynsiem thot thot ïa ki jaidbynriew bym dei riewlum kiba shong basah ha Them Iewmawlong.
“Ngi kyrpad ïa phi ba phi tuklar lem halor ki kynrum kynram jong ka Punjabi Colony da ka jingïatreilang hapdeng ki lai kynhun bad ka Sorkar Meghalaya,” ong u Secretary jong ka HPC u Gurjit Singh ha ka shithi ba la phah sha u Shah.
U la ong ba ki jingeh ba ïadei ïa ki hok bad ki nongshong shnong ha Them Iewmawlong ïa mynta la kheiñ dewthala, bad da ka jingtrei shitom jong ka Sorkar Meghalaya, ka Harijan Panchayat Committee bad kiwei kiwei ki kynhun ban poi sha ka jingïasngewthuh jingmut.
“Wat hapdeng ki jingïalang kiba bun tylli bad ki jingïakren, ka kam kaba jwat ka dang shong per ha suiñ. Watla ka jingkular ban tuklar da ka Sorkar India, kam shym la urlong satia. Ngi don ka jingshaniah lada ka Sorkar Pdeng ka shimkhia ban pynkut noh ïa kane ka kam, ka dei ban long kaba suk,” ong u Singh.
Da kaba pynpaw ba ka jingbthei bom dang shen ka dei ka jingpyrshang ban pynslem ïa ka jingstet ka kam, u Secretary ka HPC u la ong, “kane ka jingjia ym dei ban shu ieh kumto hynrei ka dei ka dak ka shin kaba ktah ïa ki jaidbynriew ritpaid kiba sah hapoh ka jylla Meghalaya. Ka jingkem ïa ki briew halor kane ka jingjia ka pynpaw ba ka dei ka jingpyrshang ban pynsyier mynsiem bad ka jingpyrshang ban pynkbum ïa ki nongshong shnong jong ka Punjabi Colony.”
“Ngi pynpaw hakhmat jong phi da ka jingsngewkhia ba ym don mano mano ruh na ka Sorkar Meghalaya, na u Myntri Rangbah ter ter ban pynrem ïa ka jingjia. Ki nongïalam saiñpyrthei, ki ïai pynmih ïa ki jingkynthoh pyrshah ïa ki nongshong shnong ka Punjabi Colony khlem sangeh, ym shym la kren eiei wat shi kyntien ruh ne ban wan jngoh ïa ka jaka ba la jia ka jingpynbthei ban pynpaw ïa ka jingsngewkhia halor ka jingbthei ne ban ai jingkyrshan ïa ki longiing,” u la ong.
Shuh shuh u Sing u la pyntip ba ka Delhi Sikh Gurdwara Management Committee, ka Shiromani Gurdwara Prabandhak Committee bad ka National Commission of Minorities, ka National Commission for Human Rights bad kiwei kiwei ki kynhun ki la wan jngoh ïa ka Punjabi Lane katba ki jaidbynriew Sikhs ki dang ïai bteng ban ïakhun na ka bynta ki hok ki jong ki.
“Namarkata, ngi kyntu ïa ka Sorkar India, hapoh ka jingïalam jong phi, ban shimkhia bad ban shim rai mardor ïa kane ka kam. Ka long kaba kongsan ym tang ban pynlong ïa ka jingtohkit kaba bniah hynrei ban pynshitom ruh ïa kito kiba ju byrngem byrsit bad kiba pyntieng kohtympan ïa ki jaidbynriew bym dei riewlum. Ngi ngeit ba ka jingsuk yn sa lah ban wanrah da ka jingpynshitom pyrshah ïa ki nongleh kam bymman, ym ban ailad ïa ki jyrwit jyrwat ban shu buhrieh hapoh u shylliah,” u la ong.
U la ong, “ki nongshong shnong ka Punjabi Colony kim kwah eiei hynrei tang ban ïoh shong suk shongsaiñ, ban noh synniang sha u sup u thiar jong ka imlang ka sahlang bad ka ïoh ka kot jong ka Jylla Meghalaya kumba ngi la leh mynta pateng la pateng. Ka jingsheptieng bad ka jingbym sngew shngaiñ ka la pynwit ym tang ïa ka bha ka miat jong ngi hynrei wat ïa ka roi ka party ha ka jylla.”
Katkum ka jingong jong u, ka dei ka kamram kong ka Sorkar Pdeng ban pyntreikam ïa ka aiñ ba ïada ïa ka hok bad ka jingshngaiñ jong ki nongshong shnong, la ka long na kano kano ka jaidbynriew.
“Ka jingtuklar deipor jong phi ïa kane ka kam ym tangba kan pynthikna ïa ka jingshngaiñ jong ki briew kiba sah ha Punjabi Colony hynrei kan long ruh ka khubor kaba khlaiñ pyrshah ïa ki jingumsnam bad ki kam thombor,” la ong ka HPC.