Shillong, Risaw 14: Ka Federation of Khasi-Jaiñtia and Garo People (FKJGP) ka la kyrpad ïa u Myntri ka tnat Pule Puthi ka sorkar jylla u Bah Lahkmen Rymbui ban tuklar halor ka jingslem ban pyndep ïa ka Block Institute of Education and Training (BIET) hapoh ka shnong Sakwang kaba ha South West Khasi Hills district.
“Ngi kyrpad ïa phi ba phin tuklar lem bad ban pynthikna ba dei ban pyndep noh kloi ïa ka BIET,” ong u President ka FKJGP u Bah Ken Nonglait ha ka shithi ba la aiti sha u Bah Rymbui ha ka sngi baar.
U la ïathuh ba ka jingslem ban pyndep ïa ka BIET ka la pynbor ïa ki nonghikai kiba dang shu sdang ban leit wad jinghikai hapoh ka District Institute of Education and Training (DIET) kaba ha Nongstoiñ, West Khasi Hills, kaba don duna ka seat, namar kadei ka bhah kaba la buh kyrpang na ka bynta ka South West Khasi Hills.
Watba la dep ban pynmih bad thaw ïa ka district ha u snem 2012, ka FKJGP ka la kam ba ki la don shibun ki jingduna ha ki kam pynroi khamtam ha kaba ïadei bad ka pule puthi khamtam eh na ka jingbym don ki jaka pule kiba biang.
“Kane ka la ktah shibun bha ïa ki samla pule kiba wan na ki longïing kiba tlot ha ka ïoh ka kot, ha kaba kane ka la pynduh noh ïa ki lad ba kin bteng ban leit pule shuh shuh shakhmat,” bynrap u Bah Nonglait.
