Phah tohkit ïa ka ophis DHS (MI) halor ka jingthied dawai rem dor na u Supplier ba khlem ïoh jingithuh

Shillong, Nailur 24 : Ka ophis Comptroller and Auditor General of India (CAG) ka la ai jingmut ïa ka sorkar jylla ba ka dei ban phah tohkit halor ka jingthied dawai remdor jongka ophis Directorate of Health Services (Medical Institutions) (DHS-MI) bad ban pynsajia ïa kito kiba donkti ha kane ka kam.
“ Ka jingthied dawai ha ka dor kaba rem ban ïa ka dor ba la ai jingbit da ka Central Purchase Board (CPB) na ki kompani ba khlem ïoh jingithuh da ka ophis DHS (MI) ka la wanrah ka jingpynlut phut kai ïa ka pisa paidbah” Ong ka kaiphod CAG halor ka Social bad Economic Sector kat haduh ka 31 tarik Lber 2022.
“ Kumta ka sorkar ka la dei ban phah tohkit ban lap ïa ka daw balei ba la thied ïa kine ki dawai na ki supplier kiba khlem ïoh jingithuh na ka sorkar ha ka dor kaba rem khnang ban ïoh pynshitom ïa kiba donkti” ong biang ka kaiphod.
Ka kaiphod ka ong ba kat kum ki jingbuh jingkheiñ ne record na ka ophis DHS (MI) ka jingthied dawai ne pynpoi dawai na ka bynta u snem 2019-20 bad 2021-22 la pyni ba ka ophis DHS (MI) ka khot tender ne Notice Inviting Tender (NIT) ha ki ar bynta kata Technical bad Financial Bids. Kane ka long ha ka 5 tarik Naiwieng 2018 bad la khot ruh na kito ki kompani kiba shna hi ïa ki dawai.
ïa ka Technical Bids la plie ha ka 7,9,10 bad 14 Kyllalyngkot 2019. ïa ka Financial Bid la plie da ka Central Purchase Board ba la khlieh da u Alld. Chief Secretary ba peit ruh ïa ka tnad ka koit ka khiah ha ka 14 Jymmang 2019.
Kat kum ki kyndon jongka NIT, wei ba la pynthikna bad ithuh ïa ka dor da ka CPB katei ka dor kan treikam bad kan neh kumjuh haduh da kut ka kontrak. Lada phah thied da kino kino ki dawai na uno uno uba thep tender ka dor ka dei ban long beit kumjuh kat haduh ban da kut por ba la ïasoi ïa ka kontrak. Lada ym lah kumta baroh kiba la ai ba uta ne kata ka kompani kin duh noh bad yn ai sha uwei pat uba kham duna ka dor. ïa kita kiba pynkheiñ ïa ka kontrak yn shah ñiew beaiñ (blacklisted na ka bynta san snem lynter.
Na ka liang ka CPB ka la ithuh bad jied ïa ka M/s Maxmed Lifescience Private Ltd, New Delhi bad M/s East Africal (India) Overseas, Uttarakhand ban pynpoi ïa ki dawai kum ka Dry Syrup Cefpodoxime Proxitil 50mg + Clavulanic Acid 125mg 30,l (dry syrup) and Tablet Ofloxacin 200mg + Ornidazole 500mg (tablet), ha ka dor 53 tyngka shi bilor bad 25 tyngka shi sla ki dawai kuli ba don 10 tylli.
Kat kum ka jinglum jingtip jongka CAG ka la lap ba ka ophis DHS (MI) ka la ai order na ka bynta u Kyllalyngkot haduh u Jymmang sha ka M/s Arengh Medical Supplier, Tura ban pynpoi 2 lak bilor ki dry syrup ha ka dor 70.40 tyngka shi bilor bad sha ka M/s Wholesale Pharmaceutical, Shillong ban pynpoi 80,370 sla ki kuli ha ka dor 90 tyngka shi sla. Kane ka la wanrah ka jingduh nong kaba haduh 0.87 klur ïa ka sorkar.
Kumta da kane ka jingthied ïa kine ki ar jait ki dawai ha ka dor kaba rem kaba long palat ïa ka dor ba la pynskhem bad ithuh da ka Central Purchase Board (CPB) kata ruh na ki Supplier kiba khlem ïoh jingithuh na ka sorkar ka long ka jingpynkheiñ ïa ki kyndon ka NIT.
Kat kum ka jingkdew ne jingpynshai na ka ophis DHS (MI) ba ïa kine ki dawai la donkam kyrkieh da ki District bad kumta la thied ïa ki ha ka dor ïew namar kine ki supplier kiba la ithuh kim lah ban pynbiang ïa kine ki dawai.
Ka CAG ka pynpaw “ ïa kane ka jubab ym lah ban pdiang ban pynpoi haduh 1.50 lak ki dawai um ne dry syrup bad 80,370 ki dawai kuli 500 mg namar la order naduh ka 31 tarik Kyllalyngkot 2019 bad la pynpoi ïa kine ki dawai dang ha u Nailur 2019 bad Nohprah 2019 kata ka mut hadien bun bun bnai naduh ka tarik ba la phah pynpoi”.
Nalor kata ka CAG ka lap ruh ba ka ophis DHS (MI) kam lah ban pynbiang ïa ki kot ki sla ba la pan ïa kitei ki dawai da ki district lane ïa ki kot ki sla ba ki supplier kiba la ïoh jingithuh ki pynpaw ba kim lah ban pynpoi ïa kitei ki dawai.
Kumta dei halor kane ka nongrim ba ka CAG ka la ai jingmut ïa ka sorkar ban phah tohkit ban lap ïa ki jingshisha bad pynshitom ïa kiba donkti kat kum ki kyndon aiñ.