Shillong, Naitung 08: Ka Garo Hills Youth Solidarity (GHYS) organisation ka la thoh sha ka tnat Public Health Engineering ban ujor halor ki projek kiba la jah kiba la pyntreikam hapoh ka Jal Jeevan Mission (JJM).
Kane ka shithi ba la phah sha u Executive Engineer ka PHE ha Williamnagar, East Garo HIlls, ka la kam ba ka ‘elevated service reservoir’ kaba ha Bansam kaba dei ha ka jinglut T. 29.41 lak bad ka ‘ground zonal reservoir’ kaba ha Rongakgre ha ka jinglut kaba T. 38.35 lak la kynthup lang hapoh ka detailed project report (DPR) hynrei ka jingshisha pat ka long ba kam shym la don satia kano kano ka jingtei.
Shuh shuh, ka jingbym sam thikna ïa ka um ka la long kaba sngewkhia bad kaba pynkyndit, ong ka GHYS ha ka shithi. Ka jingsam um sha Bansam Awe, ha ka jingshisha la dei ban pynpoi beit napoh ka jaka pynlang um kaba khuid hynrei ka paw ba u contractor u la pyndait pat ïa ka um na Megagre Songgitcham sub tank (ground zonal reservoir), kaba dei tang na ka bynta kawei ka shnong. “Kane ka jingpynkylla ïa ka jingsam ïa ka um ka don la ki daw, naba ka jingsam ïa ka um sha Bansam Awe ka la long kaba duna bad ka bym dap satia hadien ba la sam lang sha ki 2 tylli ki shnong,” bynrap ka shithi ba la phah da ka seng sha ka tnat PHE.
