Shillong, Naitung 19 : Ka kynhun ki nos ha Meghalaya, ha ka sngi Thohdieng ki la kyntu ïa ka Myntri ka Koit ka Khiah Dr Ampareen Lyngdoh, ban pyndam noh shwa ïa ka jingpynbna thungkam shipor ne contractual ïa ki nos kaba la pynbna dang shen mynta u bnai.
Haba kren bad ki lad pathai khubor hadien ka jingkynduh ïa ka Myntri, na ka liang u samla Lurstep Nongrum uba ïalam ïa ka kynhun u la ong ba kum ki nos kiba trei ïa ka kam kaba ïadei bad ka Koit ka Khiah jong ki paidbah ka jylla kim sngew ïahap satia ban shu khot thung kam shipor kumba la pynbna dang shen da ka sorkar.
Haba jubab halor ka jingkylli na ka liang kitei ki nos kiba trei ha kylleng ki jaka ai jingsumar kum ki nongtrei ba shi por ki ong ba na ka liang ka Myntri ka la pynshai ba ïa katei ka jingthung kam la leh da ka tnad Platyngka jong ka jylla.
Shwa kane kitei ki nos ki la ong ba kum ki nos ba shah thung kam shipor ki aiti lut met bad mynsiem ha ka kam ban ai ka jingshakri kaba paka tam eh ïa ki nongpang watla ka jingsiew bad ki jingmyntoi ba ki ïoh ka long kaba duna nalor ba ka kam ba ki trei kadei ka bym skhem.
Tangba ki la ïathuh ba halor kiba bun ki mat ba ki pynpaw ha ka, na ka liang ka Myntri ka la kular ba kan sa shimkhia ïa kane ka mat bad kan sa khot biang ban kynduh bad ki ha ka taiew ban wan.
