Shillong, Nailur 14 : Ka Federation of Khasi Jaiñtia and Garo People (FKJGP) Central Body ka phah ïa ka khubor sngewlem halor ka jingkhlad noh jong u Myntri Rangbah barim ka Jylla u Dr. DD Lapang da kaba pynkynmaw ba u dei uwei na ki rangbah uba la noh synñiang shi katdei ia ka Jaidbynriew bad ïa ka jylla hi baroh kawei.
“Lada ngi kyrtiang dien shaphang ka jinglong jingim jong u Dr. DD Lapang mynba u dang im, ngin ym lah satia ban jer bad ban ñiewtang ïa uba bun bah u synniang u bynhei ïa kaba utei u riew-shemphang u la bet bad ïa ki soh la ïohi shynna tad haduh mynta bad kan ïai sah khana pateng la pateng,” ong ka Seng ha ka kyrwoh na u President, Bah Dundee Cliff Khongsit.
Shuh shuh ka la ong ruh ba ki tip bad sngewthuh shai ba ka jingkhlad noh jong utei u Riew Rangbah uba long uwei na ki Païa Khnong, ka long ruh ka jingduh kaba khraw ym tang ïa ka iing ka sem hynrei ïa ka Jaidbynriew bad ïa ka Jylla hi baroh kawei.
“Kumta na ka FKJGP Central Body, ngi phah ka kane ka kyrwoh sha phi kum ka Iing baroh kawei ba u Nongbuh Nongthaw un syrpai syrpud ïa ka mynsiem ba la mong ba un ai ka jingpyntngen ïaphi kum ka iing ha kum kane ka por bad ngi duwai ruh ba ka mynsiem jong u para shakri jongngi un ïoh ïa ka jingjahthait sha ki bymjukut,” ong ka seng ha ka kyrwoh sngewlem.
