Shillong, Jymmang 21: Ka Tnad Animal Husbandry & Veterinary kala khang ïa ka khyrdop ban talasi ïa ki masi shoh doh ba wan sha Jylla ha Umling namar ka jingbthah jong ka National Highway Authority of India (NHAI) bala plie ïa ka khyrdop khlem da ïoh jingbit.
U Myntri ka Tnad Animal Husbandry & Veterinary Bah Sanbor Shyllai ula pyntip ba ka jingtreikam jong kane ka Check Post ka Tnad ha Umling la hap ban pynsangeh naduh ka 21 tarik Jymmang namar ka NHAI kala kyrpad ïa ka Tnad ban da pan jingbit ban pynieng ïa ka khyrdop.
“Kane ka khyrdop kan nang ïai khang katbym pat ïoh jingbit na ka NHAI. Ka Tnad kan sa pan ïa ka jingbit na ka NHAi bad lada donkam, kan pan jingbit ruh ban pynieng ïa ki khyrdop ha kiwei pat ki jaka kiba dang hap hapoh ka jingkhmih ka Sorkar Jylla kum ha 9 mile” ula ong.
Kat kum ka jingong jong u, kane ka khyrdop ka dei na ka bynta ban talasi (check) ïa ki Transit Permit bad ka Health Certificate shuwa ban shah wan kit ïa ki masi shoh doh sha ka Jylla. U ong ba ka ba kongsan eh ka long ban pynthikna ba ki mrad ba doh jingpang kim dei satia ban ïoh rung sha Jylla.
U Bah Sanbor u ong ba ka Tnad kan pynthikna ruh ba kin don kiwei kiwei ki jingpynbiang kum ka bor pahara, ki jingdonkam jong ki Doktor bad ki Nongtrei nalor ban pyndait ruh ïa ki kor CCTV hadien bala pyntreikam ïa ka khyrdop.
Une u Myntri ula kular ban buh ïa ki kyndon kiba tyngeh ha kaban ïakhun pyrshah ïa ka jingkhaii tuh ïa ki masi shoh doh haba ong ruh ba ka Tnad kan sa ïaktreilang bad ka Tnad Pulit ha kylleng ki bynta jong ka Jylla.
U Bah Sanbor ula ong ba ka Tnad kan pynthikna ruh ba baroh ki jaka Iew die masi/sniang.syiar ki bym pat ïoh jingbit ne bym biang ki jingdonkam baroh, kiba don ha Byrnihat kin sa shah khang noh bad shem ka Tnad kan sa phah da ka notice sha ki.
