Phah ka Sorkar u Modi ban pynlong skul ha ka sngi U Blei ruh ban rakhe dap 4 snem ka NEP
![](https://mawphor.com/wp-content/uploads/2022/05/mawphor-1-1.jpg)
Shillong, Naitung 22: Ka District School Education Officer (DSEO) jong ka East Khasi Hills , ka Kong M. Lyngwa kala bthah ïa baroh ki skul ha East Khasi Hills District ban pynlong ïa ka jingrakhe dap saw snem jong ka National Education Policy 2020 bad ha kane ka jingrakhe kaban long shi taiew lynter, sdang mynta ka sngi ka 22 tarik u Naitung yn pynkut ha ka 28 tarik mynta u bnai kaba dei artad ka Sngi U Blei.
Kane ka long katkum ka jingbthah jong ka Ministry of Education jong ka sorkar pdeng.
Ïa kane ka jingrakhe la tip kum ka Shiksha Saptah, ha kaba la bthah ba baroh ki skul kin pynlong ïa ki Prokram bapher bapher baroh shi taiew. Ban pynthikna ba baroh ki skul ki dei ban pynlong ïa kane ka jingrakhe, la bthah ruh ba dei ban da shon dur bad ring video bad phah sha ka ophis jong DSEO.
Ki prokram kiba dei ban pynlong ha kine ki hynñiew sngi ki long ha ka 22 tarik ka Teaching- Learning Matertal Day. Nangta ha ka 23 tarik ka Foundational Literacy and Numeracy day, 24 tarik ka Sports Day, 25 tarik ka Cultural day, 26 tarik ka Skilling and Digital Day, 27 tarik ka Eco Club for Mission LIFE? School Nutrition Day bad ha ka 28 tarik pat ka Community Involvement Day.
Khyndiat khyndiat kynta haba kane ka jingbthah ka la saphriang ha ki Social Media, kiba bun ki paidah ki la sngew pyrshah jur ia kane ka jingbthah ban pynlong ïa ka jingrakhe wat ha ka sngi U Blei ruh, kaba ki paid Khristan ki rakhe kum ka sngi ba kyntang.
“Ngan nym phah ïa ki khun jong nga sha skul da lei lei ruh em”, la ong iwei i longkmie ba la comment ha youtube haba la mih kane ka khubor ha youtube channel.
Kiba bun kiwei pat ki la kynnoh ba kane kadei ka buit jong ka sorkar u Modi ban nym kheiñ kyntang shuh ïa ka sngi U Blei.
Ki la ong ruh ba kim pyrshah ïa ka jingpynlong ha kiwei pat ki sngi bad wat ka sngi saitjaiñ kaba dei ka sngi shuti ruh, hynrei kaba ki pyrshah eh kadei ba pynlong ha ka sngi U Blei.
Lah ban kdew hangne ruh ba ka jingpynlong prokram da ka sorkar pdeng hangne ha Meghalaya ha ka sngi U Blei kam dei ka sien kaba nyngkong, hynrei kadei kaba la bunsien bad dei namar kane ka daw ba ka mih ka jingpyrshah kaba kum kane.