Mynta ka sngi yn tur ki CEM na North East ban kynduh ïa u Amit Shah ha Delhi

Shillong, Naitung 22 : Ka kynhun jong ki 10 tylli ki Autonomous District Council (ADC) na ka thaiñ shatei lam-mihngi jong ka Ri kin kynduh mynta ka sngi Balang ïa u Myntri ka tnad Kampohiing ka Ri, u Amit Shah ha nongbah Delhi ban kyntu ba un tuklar lang ban pyndep noh ïa ka jingpynbeit thymmai ïa ka Khyrnit Ba Hynriew jong ka Riti Synshar jong ka Ri, ha ka Dorbar Lyiur kaba la ïaid mynta.
Ïa kane ka rai la shim ha ka jingïalang jong baroh ki Chief Executive Member (CEM) jong ki 10 tylli ki ADC, (kata kynthup ïa ki 3 ngut ki CEM na Meghalaya, 3 ngut na Mizoram, lai ngut na Assam bad iwei na Tripura) ha ka jingïalang kaba long ha nongbah New Delhi ha kane ka sngi Ba-ar.
Haba kren sha ki lad pathai khubor hadien ka jingïalang, u CEM ka KHADC, Bah Pynïaid Sing Syiem u la ong, “Da kawei ka sur ngi la rai lang ban kynduh ïa u Myntri ka tnad Kampohiing ka Ri ban kyntu bad kyrpad ïa ka jingtuklar lem jong u na ka bynta ban wanrah noh ïa ka jing pynbeit thymmai ïa ka Khyrnit kaba Hynriew bad ruh ban mynjur ïa ka ha kane ka Dorbar Lyiur kaba ïaid mynta.”
U Bah Pynïaid u la ïathuh ruh ba na ka liang u Amit Shah u la ai ruh ka jingkular ba un kynduh ïa katei ka kynhun jong ki 10 ADC ha kane ka sngi Balang.
Na ka liang u CEM ka KHADC u la ong ruh ba kum ki District Council kin ai ruh da ka jingthoh sha ka sorkar pdeng ban wanrah ka jingpynbeit thymmai na ka bynta ban pynkhlaiñ shuh shuh ïa ki kyndon jong ka Khyrnit kaba Hynriew kaban ïada ïa ka jinglong tynrai jong ki trai ri trai muluk ka thaiñ shatei lam-mihngi jong ka Ri.
Ha kajuh ka por u la pyntip ruh ba na ka liang ka KHADC kan sa phah la ka jong ka dorkhas ha u Amit Shah ban ïai ban ba ka Council ka ieng ha ka nongrim ba ïa ka jingpynbun ïa ki seat kan dei sha ka 37 ngut ha kaba na 6 ngut kin dei kiban jied da u paidbah bad 2 ngut pat kiban shu thung.
Kumba long mynta, ka KHADC ka don 29 ngut ki MDC ba shu jied da u paidbah bad uwei ba shu thung kumto.
Shuh shuh u ong ruh ba kin banjur ban weng noh ïa ka kyntien ‘unrepresented tribes’. Nalorkata u ong ruh ba na ki ar ngut ki MDC kiban shu thung kumto, iwei in dei kyrpang na ki kynthei. U CEM u ong ruh ba haba ïadei bad ka jingpynïaid ïa ka elekshon ha District Council ki la ai jingmut ba dei ban pynlong katkum ki kyndon elekshon jong ka Khyrnit ba Hynriew ym da ka tnad Elekshon jong ka ri India.
U CEM u la pyntip ruh ba namar ba u Lat ka Jylla un wan jngoh ïa ka KHADC ha kane ka sngi Balang kumta un ym lah ban ïalam ïa ka kynhun ban kynduh ïa u Amit Shah. Na bynta kane ka kam u la pyntip ba la bynshet ha u Chairman ka Council ban ïalam ïa ka kynhun.