Phah ka Committee u Justice Katakey ban sorjamin na suiñ ïa ka jingtih dewiong beaiñ ha Jylla

Shillong, K’lyngkot 28 : Ka Committee u Justice BP Katakey (Rted) jong ka ïing Bishar Meghalaya High Court, ka la bthah ban pynlong ïa ka sorjamin (survey) na suiñ ban ithuh bad ïoh jingkheiñ ïa u dewiong bym pat kheiñ bad kumjuh ruh ïa ka jingtih dewiong beaiñ.
La bynshet ha ka Agency shimet ba kan leh ïa kane ka sorjamin bad la aipor ba kan aiti ïa ka kaiphod ba khatduh kynthup ia ki map ba bniah hapoh ka 28 tarik u Rymphang.
Haba ïakren bad ki nongthoh khubor hadien ka jingïalang, u Justice Katakey ula pynpaw ïa ka jingdonkam ban leh sorjamin bad ong “Ka Sorkar kala bynshet ban leh ïa ka sorjamin na suiñ ha ka agency shimet, bad ki nongmihkhmat jong ki ruh kila wan ïashim bynta ha ka jingïalang. Ki la ïasdang ïa ka kam bad nga la bthah ïa ki ban aiti ïa ka kaiphod bad ki map hapoh ka 28 tarik Rymphang.
U pyntip ba ka Sorkar kala bynshet ha ka Meghalaya Basin Development Agency (MBDA) ba kan leh ïa ka sorjamin na suiñ ha ki hynriew tylli ki jaka ka South West Khasi Hills District.
U pyntip ba ka jingthmu jong kane ka sorjamin ka long ban ithuh ïa ki par ba dang shu tih thymmai bad ban lum jingkheiñ ïa ka jingdon u dewiong.
“Ka MBDA kala shah bynshet ban leh ïa ka sorjamin na suiñ ha ki 6 tylli ki jaka ka SWKH ban wad ïa ka jingdon ki par ba dang shu tih thymmai bad ka jingdon u dewiong ha ryngkew. Kin sa aiti ïa ka kaiphod sha nga hapoh ka sngi Thohdieng” pynthikna u Justice Katakey.
Ula pyntip ruh ba ki don katto katne ki mining plans kila ïoh jingmynjur kat kum ka Mines & Minerals (Development and Regulation) Act u snem 1957, hynrei ka jingtih dewiong bala ithuh da ka aiñ, kan dang sdang hapoh ka Jylla.
“Ha kane ka jingïalang ba mynta, ngi la ïakren ïa ki sienjam bala shim da ka Sorkar ban pyntreikam ïa ka jingbthah jong ka ïing Bishar Supreme Court haba ïadei bad ka khajna jong u dewiong ba tih beaiñ. Wat hapdeng ka jingmynjur ïa ki katto katne ki mining plan da ka Sorkar India hapoh ka act ba 1957, ka jingtih dewiong kat kum ka aiñ kan dang sdang ha Meghalaya. Kumta, kano kano ka jingtih dewiong ïa mynta ka dei kaba leh beaiñ suda” ong u Katakey.